टीव्ही अभिनेत्री अदिती द्रविड ‘माझ्या नवऱ्याची बायको’ या मालिकेत महत्त्वाची भूमिका साकारून अदिती घराघरात पोहोचली. ‘सुंदरा मनामध्ये भरली’ या मालिकेतही ती दिसली होती. अदितीने नुकतीच एका युट्यूब चॅनेलला मुलाखत दिली आहे. या मुलाखतीत तिने आयपीएल व क्रिकेटबद्दल भाष्य केलं.
अदितीने ‘अमुक तमुक’ला दिलेल्या मुलाखतीत आयपीएलबद्दल परखड मत मांडलं. ती म्हणाली, “माझ्यासारख्या लोकांना आयपीएमधीलही सगळे खेळाडू माहीत नसतात. सगळ्या खेळाडूंची नावं माझ्यासारख्या कित्येक लोकांना माहीत नाहीत. आयपीएल न आवडण्याचे हे एक कारण आहे. आयपीएल ही एक मिक्स भेळ आहे. आपण खेळाला सपोर्ट करतोय, खेळाडूंना करतोय, रंगाला सपोर्ट करतोय, राज्यांना करतोय की नावांना हे कळतंच नाही.”
“क्रिकेट हा एक खेळ आहे आणि माझ्यासाठी देशभक्ती हा मुद्दा आहे. मी लहान असल्यापासून भारताची मॅच बघते. भारत-पाकिस्तानची मॅच…आम्ही सगळे एकत्र मॅच बघायला बसायचो. जागेवरुन हलायचं नाही, कारण उठलो की विकेट पडणार, भारत मॅच हरणार…असं सगळं असायचं. माझे वडील अजूनही प्रोफेशनल क्रिकेट खेळतात. या सगळ्यामागे एक भावना असायची. मनापासून वाटतंय म्हणून आम्ही सपोर्ट करायचो,” असंही पुढे अदिती म्हणाली.
हेही वाचा>> “आता तू पण विचित्र…”, फोटोशूटसाठी हटके पोझ दिल्यामुळे प्राजक्ता माळी ट्रोल
“आयपीएल सुरू झाल्यानंतर या गोष्टींवर माझं इमोशन नाही, हे मला जाणवलं. सचिन तेंडुलकर व रिकी पाँटिग एका टीममध्ये असल्याचा त्रास व्हायचा. ऑस्ट्रेलियन किती माजोरडे आहेत, असं आपण म्हणायचो. या गोष्टींमुळे मला आयपीएल आवडत नाही,” असंही पुढे अदितीने सांगितलं.
अदिती द्रविड ही भारतीय क्रिकेटर राहुल द्रविडची पुतणी आहे. अदितीने ट्वीटरवर घेतलेल्या #Askme सेशनमध्ये एका चाहत्याने याबाबत तिला प्रश्न विचारला होता. यावेळी तिने “राहुल द्रविड माझे चुलत काका आहेत,” असं सांगितलं होतं.
