Prajakta Mali: अभिनेत्री प्राजक्ता माळी सध्या ‘चिकी चिकी बुबूम बुम’ चित्रपटांमुळे चर्चेत आहे. प्रसाद खांडेकर दिग्दर्शित ‘चिकी चिकी बुबूम बुम’ चित्रपट २८ फेब्रुवारीला प्रदर्शित झाला असून यामध्ये प्राजक्तासह स्वप्नील जोशी, प्रार्थना बेहेरे, प्रथमेश शिवलकर, रोहित माने, वनिता खरात असे बरेच तगडे कलाकार मंडळी झळकले आहेत. त्यामुळेच प्राजक्ता या चित्रपटाचं ठिकठिकाणी प्रमोशन करताना दिसत आहे. अशातच प्राजक्ताचा एक व्हिडीओ व्हायरल झाला आहे. ज्यामध्ये तिने स्वप्नातल्या हिरोबद्दल सांगितलं आहे.
काही दिवसांपूर्वी एका मुलाखतीमध्ये प्राजक्ता माळीने लग्नाला तयार असल्याचं सांगत आईला मुलं बघण्याची परवानगी दिल्याचं म्हटलं होतं. एवढंच नव्हे तर तिला दोन मुलांनी पत्राच्या माध्यमातून लग्नाची मागणी घातली होती. यामधील एक पत्र प्राजक्ताला खूप आवडलं होतं. त्यानंतर आता प्राजक्ताने तिच्या स्वप्नातला हिरो कसा आहे? याबाबत सांगितलं आहे.
‘झी चित्र गौरव पुरस्कार २०२५’ सोहळ्याला प्राजक्ता माळीने खास उपस्थिती लावली होती. या सोहळ्यात तिला अमेय वाघने स्वप्नातल्या हिरोबाबत विचारलं. अमेय म्हणाला की, प्राजक्ता तुझ्या स्वप्नातला हिरो कसा आहे? काय वाटतं? चहा पिणारा की कॉफी पिणारा? यावर प्राजक्ता म्हणाली, “चहा पिणारा.” अमेयने विचारलं, “का?” तर प्राजक्ता म्हणाली, “मला चहा छान बनवता येतो आणि मला प्यायलाही आवडतो. तर घरात तेच बनेल.” त्यानंतर अमेयने विचारलं, “दाढी की क्लिन शेव?” प्राजक्ता दाढी असं म्हणाली. तेव्हा अमेय म्हणाला, “का?” त्यावर प्राजक्ता म्हणाली, “छान दिसते. मराठी माणसाला मिशी आणि दाढी पाहिजे.”
पुढे अमेयने विचारलं, “समुद्र किनाऱ्यावर फिरायला घेऊन जाणारा की डोंगरावर फिरायला घेऊन जाणारा?” प्राजक्ता माळी म्हणाली की, डोंगरावर. अमेयने विचारलं, “समुद्र किनाऱ्यावर का नाही?” तर प्राजक्ता म्हणाली की, डोंगरावर प्रेम फुलेलं. समुद्र किनारी जरा उथळ फ्लटिंग होईल. हे ऐकताच अमेय वाघ म्हणतो, “म्हणजे जे कोकणात, गोव्यात राहतात ते उथळ फ्लटिंग करतात?” प्राजक्ता म्हणाली, “नाही. त्याने मला डोंगरावर घेवून जाव मग.”
“ज्याला तुझा हिरो व्हायचं आहे, त्याने फक्त प्रवास करत राहावा, असं तुला म्हणायचं आहे?” यावर प्राजक्ता माळी, “नाही. मला घेऊन फिरायला जावं डोंगर माथ्यावर.” शेवटी अमेयने विचारलं, “तुझ्यावर कविता करणार की तुझ्या कविता ऐकणारा?” प्राजक्ता म्हणाली की, कविता ऐकणारा. मग अमेय म्हणतो, “मग मला असं वाटतं, जो कोण आहे. ज्याने तुझ्या कविता ऐकल्या पाहिजे, त्याच्यासाठी एक कविता होऊन जाऊ दे.” त्यानंतर प्राजक्ता प्रेम म्हणजे प्रेम असतं कविता ऐकवते.
दरम्यान, प्राजक्ता माळीच्या ‘फुलवंती’ चित्रपटाला नुकतंच ‘झी चित्र गौरव २०२५’ सोहळ्यात गौरविण्यात आलं. एक-दोन नव्हे तर ‘फुलवंती’ चित्रपटाला तब्बल सहा पुरस्कार मिळाले. द मोस्ट नॅचरल परफॉर्मन्स ऑफ द इअर – प्राजक्ता माळी, सर्वोत्कृष्ट छायाचित्रण – महेश लिमये, सर्वोत्कृष्ट गायिका – वैशाली माढे, सर्वोत्कृष्ट नृत्य दिग्दर्शन – उमेश जाधव, सर्वोत्कृष्ट वेशभूषा – मानसी अत्तरदे, सर्वोत्कृष्ट रंगभूषा – महेश बराटे हे सहा पुरस्कार ‘फुलवंती’ चित्रपटाला मिळाले.
