“खरं सांगायचं तर…” सायली संजीवने ऋतुराज गायकवाडबरोबर रिलेशनशिपच्या चर्चांवर मौन सोडले

चेन्नई सुपर किंग्जचा धडाकेबाज फलंदाज ऋतुराज गायकवाड आणि मराठी चित्रपटसृष्टीतील लोकप्रिय अभिनेत्री सायली संजीव रिलेशनशिपमध्ये असल्याच्या चर्चा सुरु आहेत. आयपीएलच्या सामन्यादरम्यान अनेकांनी ऋतुराजच्या खेळावरुन सायलीच्या पोस्टवर कमेंट केल्या होत्या. त्यामुळे त्या दोघांचे अफेअर असल्याचे बोललं जात आहे. मात्र अद्याप याबद्दल त्या दोघांनीही भाष्य केले नव्हते. मात्र नुकतंच बस बाई बस या कार्यक्रमावेळी सायली संजीवने यावर मौन सोडले.
आणखी वाचा : “आमचं लग्न…” वैभव तत्ववादीबद्दल प्रार्थना बेहरे स्पष्टच बोलली

बस बाई बस या कार्यक्रमातील महिलांनी सायलीला ऋतुराजबद्दल प्रश्न विचारला. यावेळी सायलीबरोबर अभिनेता शरद केळकरही सहभागी झाला होता. सायलीला ऋतुराजबद्दलचा प्रश्न विचारल्यानंतर शरदने तिची गंमत केली. ‘जर तो तुझा मित्र असेल तर प्लीझ मला त्याच्याकडून एक बॅट हवी हा… माझ्यासाठी एक बॅट मागून घे’ असे तिला गंमतीत म्हटले. त्यावर तिने ‘मी तुम्हाला बॅट मिळवून देऊ शकते’, असे म्हटले. त्यानंतर या प्रश्नाचे तिने सविस्तर उत्तर दिले. ‘मी आणि तो फार चांगले मित्र आहोत’, असे सायली म्हणाली.

“खरं सांगायचं तर आयपीएल खेळणाऱ्यांपैकी दोन-तीन माझे चांगले मित्र आहेत. त्यातील एक रॉयल चॅलेंजर बँगलोर, ऋतुराज चेन्नई सुपरकिंग्ज, तुषार देशपांडे हा पण चेन्नई सुपरकिंग्ज मध्ये आहे. हे सर्वजण माझे खरंच खूप चांगले मित्र आहेत. त्यांना माझी काही दिया परदेस ही मालिका फार आवडायची. ते ती मालिका बघायचे. मला ही गोष्ट कळल्यानंतर मी जरा थक्कच झाली. क्रिकेटपटू ही मालिका का बघतात हेच मला कळत नव्हते. एकतर ते तिघेही माझ्यापेक्षा वयाने लहान आहेत”, असे सायली संजीव म्हणाली.

आणखी वाचा : “प्रत्येक घाटात मला हा भास होतो…”, आदिनाथ कोठारेची ‘ती’ पोस्ट चर्चेत

दरम्यान सायली आणि ऋतुराजच्या अफेअरच्या चर्चा गेल्या आयपीएलपासून रंगल्या आहेत ऋतुराजने सायलीच्या वनपीस घातलेल्या फोटोवर कमेंट केली होती. त्या कमेंटमुळे या चर्चा सुरु झाल्या होत्या. ऋतुराजने तिच्या त्या फोटोवर वाह अशी कमेंट करत हार्ट इमोजी शेअर केले होते. त्यावर सायलीनेही हार्ट इमोजी शेअर करत त्याला रिप्लाय दिला होता. त्यानंतरच त्यांच्या अफेरच्या चर्चांना उधाण आले होते.