स्पृहा जोशी हे नाव नेहमीच मराठी मनोरंजन सृष्टीतील लोकप्रिय अभिनेत्रींच्या यादीत सामील असतं. उत्तम अभिनेत्री आणि संवेदनशील कवयित्री, उत्कृष्ट सूत्रसंचालिका म्हणून तिला ओळखलं जातं. स्पृहाने आतापर्यंत विविध भूमिका साकारल्या आहेत. यामुळे घराघरात तिला एक वेगळीच ओळख मिळाली आहे. सध्या ती तिच्या ‘लोकमान्य’ या मालिकेमुळे चर्चेत आहे. अशातच तिने तिच्या आयुष्याबद्दलचं एक गुपित उघड केलं आहे.
तिने नुकतीच ‘व्हायफळ’ या युट्युब चॅनलला मुलाखत दिली. यावेळी तिने लहानपणीपासून तिला मिळत गेलेली शिकवण, तिच्या आवडीनिवडी, विविध विषयांवरील तिची मतं शेअर केली. याचवेळी तिने कोणालाही तिच्याबद्दल माहीत नसलेली एक गोष्टही सांगितली.
आपल्याला पडणाऱ्या स्वप्नांबाबत तिला खूप कुतूहल आहे. स्वप्न कशी पडतात, ती आपल्या कशी लक्षात राहतात, आपण झोपल्यावर आपला मेंदू कशाप्रकारे काम करतो याबद्दल जाणून घ्यायला तिला खूप आवडतं. एक दिवस याबद्दलचं एक भाषण ऐकताना त्यात सांगितलेली एक ट्रिक तिने आचरणात आणायचं ठरवलं. त्यानुसार जेव्हा शुटींग नसेल तेव्हा सकाळी तिला आदल्या रात्री स्वप्नात कोण दिसलं? ती एखादी जागा होती का? की माणसं होती? घडलेली गोष्ट दिसली? की घडणार आहे अशी गोष्ट दिसली? हे सगळं आठवण्याचा प्रयत्न करते.
मुख्य म्हणजे या सगळ्या गोष्टी ती तिच्या डायरीमध्ये लिहून ठेवते. ती तिच्या डायरीमध्ये तिला पडलेल्या स्वप्नांबद्दल लिहिते हे आतापर्यंत कोणालाही माहीत नव्हतं. हे तिच्या घरच्यांनाही माहीत नाही असा खुलासा तिने यावेळी केला.
