Actress Rutuja Limaye Wedding : २०२४ मध्ये छोट्या पडद्यावरचे बरेच कलाकार लग्नबंधनात अडकले. रेश्मा शिंदे, अभिषेक गावकर, निखिल राजेशिर्के, शाल्व किंजवडेकर, किरण गायकवाड या सगळ्या कलाकारांच्या लग्नातील Inside फोटो गेली महिनाभर सोशल मीडियावर व्हायरल होत आहेत. आपल्या आवडत्या कलाकारांना आयुष्यात एक नवीन सुरुवात करत असल्याचं पाहून चाहत्यांनी देखील आनंद व्यक्त केला. आता लोकप्रिय मालिकांमध्ये झळकलेल्या आणखी एका अभिनेत्रीने लग्नगाठ बांधली आहे.
छोट्या पडद्यावरील विविध मालिकांमध्ये महत्त्वाच्या भूमिकेत झळकणाऱ्या अभिनेत्री ऋतुजा लिमयेचा विवाहसोहळा डिसेंबर महिन्यात थाटामाटात पार पडला. याचे सुंदर फोटो शेअर करत अभिनेत्रीने ही आनंदाची बातमी आपल्या चाहत्यांना दिली आहे. ऋतुजाने लग्नात पारंपरिक लूक केल्याचं पाहायला मिळालं. लाल रंगाचा भरजरी लेहेंगा, सुंदर दागिने या लूकमध्ये ऋतुजा फारच सुंदर दिसत होती.
ऋतुजाचा नवरा हृषिकेश पाटील सुद्धा अभिनेता व निर्माता म्हणून ओळखला जातो. अभिनेत्रीने साखरपुडा झाल्यावर हे दोघंही गेल्या चार वर्षांपासून रिलेशनशिपमध्ये असल्याचं स्पष्ट केलं होतं. “१८ एप्रिल २०२१ ते २६ नोव्हेंबर २०२४… रात्री खूप वेळ बोलणं, एकमेकांना दिलेलं वचनं, गर्लफ्रेंड-बॉयफ्रेंड म्हणून चार वर्षांतचा प्रवास ते आयुष्यभराचे जोडीदार हा प्रवास खूपच सुंदर होता.” असं कॅप्शन देत अभिनेत्रीने प्रेमाची जाहीर कबुली दिली होती. आता ऋतुजा आणि हृषिकेश लग्नबंधनात अडकले असून त्यांनी आयुष्याच्या एका नव्या प्रवासाला सुरुवात केली आहे.
‘मिस्टर अँड मिसेस’ असं म्हणत ऋतुजाने लग्नाचे फोटो आणि व्हिडीओ सोशल मीडियावर शेअर केले आहेत. दरम्यान, अभिनेत्रीच्या कामाबद्दल सांगायचं झालं, तर तिने आतापर्यंत अनेक लोकप्रिय मालिकांमध्ये भूमिका साकारल्या आहेत. ‘नवे लक्ष्य’, ‘जय देवा श्रीगणेशा’ या ‘स्टार प्रवाह’च्या लोकप्रिय मालिकांमध्ये ती झळकली आहे. तसेच ‘चुकभूल द्यावी घ्यावी’, ‘त्या रात्री काय घडलं’ या मालिकांमध्ये देखील तिने काम केलेलं आहे. भरत जाधव यांच्याबरोबर ‘सही रे सही’ या नाटकात देखील ती झळकली आहे.
