‘बिग बॉस १६’ या बहुचर्चित शोचं विजेतेपद कोण पटकावणार? याकडे संपूर्ण जगाचं लक्ष लागून राहिलं होतं. अखेरीस रॅपर एमसी स्टॅनने ‘बिग बॉस’च्या ट्रॉफीवर आपलं नाव कोरलं आहे. शिव ठाकरे व एमसीस्टॅन हे ‘बिग बॉस’चे टॉप २ सदस्य होते. एमसी स्टॅन विजेता तर शिव उपविजेता ठरला. दोघांमध्ये ‘बिग बॉस’ची ट्रॉफी जिंकण्यासाठी बरीच चढाओढ पाहायला मिळाली. मराठमोळा शिव मात्र या ट्रॉफीपासून दूर राहिला.
शिवला प्रेक्षकांसह त्याच्या चाहत्यांचाही भरभरुन पाठिंबा मिळाला. मराठी कलाकारही शिवसाठी एकवटले होते. शिवला अधिकाधिक वोट करा अशी पोस्ट या कलाकारांनी सोशल मीडियाद्वारे शेअर केली होती. मात्र शिव विजेतेपदापासून हुकला. शिवच विजेता हवा होता असं त्याचे चाहतेही म्हणत आहेत.
शिवला सुरुवातीपासूनच पाठिंबा देणार ‘बिग बॉस मराठी’च्या पहिल्या पर्वाची विजेती मेघा धाडे हिने त्याच्यासाठी खास पोस्ट शेअर केली आहे. मेघा सातत्याने शिवला पाठिंबा देत होती. शिवच घरी ट्रॉफी घेऊन येणार असं तिचंही म्हणणं होतं. आता शिवबरोबरचा फोटो शेअर करत तिने त्याच्यासाठी खास मॅसेज लिहिला आहे.
मेघा म्हणाली, “तू ट्रॉफी जिंकला नाहीस, पण लाखो लोकांनी मनं जिंकण्यास यशस्वी ठरलास. खूप अभिनंदन. आम्हाला तुझा अभिमान आहे”. मेघाने शिवचं तोंडभरुन कौतुक केलं आहे. मेघाच्या या पोस्टवर नेटकऱ्यांनी व्यक्त होण्यास सुरुवात केली आहे. आपला मराठी माणूस देशाबाहेरही प्रसिद्ध झाला, खरा विजेता शिव ठाकरेच आहे, आमच्यासाठी शिव ठाकरेच विजेता आहे अशा अनेक कमेंट नेटकऱ्यांनी केल्या आहेत.
