‘होणार सून मी ह्या घरची’ या मालिकेतून घराघरात पोहोचलेला श्री अर्थात अभिनेता शशांक केतकर नेहमी चर्चेत असतो. गेल्या अडीच वर्षांपासून शशांक ‘मुरांबा’ या लोकप्रिय मालिकेतून प्रेक्षकांचं मनोरंजन करत आहे. या मालिकेत त्याने साकारलेली अक्षयची भूमिका देखील प्रेक्षकांच्या चांगलीच पसंतीस उतरली आहे.
काही दिवसांपूर्वी शशांकने नवी कार घेतल्याची पोस्ट शेअर केली होती. पर्यावरणाच्या दृष्टीने विचार करून अभिनेत्याने इलेक्ट्रिक कार खरेदी केली. त्यामुळे नेटकऱ्यांची शशांकचं खूप कौतुक केलं. पण त्याने ही इलेक्ट्रिक कार डिसेंबरमध्येच घेतली होती. तसेच त्याने या कार व्यतिरिक्त स्वतःचं नवं घर देखील घेतलं आहे, याचा खुलासा नुकताच शशांकने एका मुलाखतीमध्ये केला.
हेही वाचा – Video: ‘पारु’ मालिकेचा नवा प्रोमो पाहिलात का? ‘जीव माझा गुंतला फेम’ पूर्वा शिंदेसह झळकणार ‘हे’ कलाकार
अभिनेता शशांक केतकर नुकताच ‘पुढारी’ या वृत्तसंस्थेच्या ‘शो कल्ला CAR’यामध्ये सहभागी झाला होता. यावेळी त्याने नवं घर घेतल्याचा खुसाला केला. शशांक म्हणाला, “मी गाडी डिसेंबरमध्येच घेतली. आणखी एक खूप छान गोष्ट म्हणजे मी नवं घरही घेतलं आहे. मी त्याचे फोटो सोशल मीडियावर टाकले नाहीत. कारण मला सोशल मीडियावर सतत फोटो टाकायला आवडत नाही. काही घेतलं की टाका फोटो, हे आवडत नाही. आपल्या कुटुंबातच या गोष्टी साजऱ्या कराव्यात असं मला वाटतं.”
दरम्यान, शशांक केतकरच्या कामाबद्दल बोलायचं झालं तर तो मराठी चित्रपटांमध्येही झळकला आहे. तसंच आता तो हिंदी सिनेसृष्टीतही सक्रिय झाला आहे. हंसल मेहता यांच्या ‘तेलगी स्कॅम २००३’ (Scam 2003) या वेब सीरिजनंतर तो करण जोहरच्या सीरिजमध्ये पाहायला मिळणार आहे.
