रमा व अक्षयची जोडी ही प्रेक्षकांची लाडकी आहे. ‘मुरांबा'(Muramba) मालिकेतील या जोडीने प्रेक्षकांच्या मनावर राज्य केले आहे. लोकप्रिय असणाऱ्या मालिकांपैकी एक अशी या मालिकेची ओळख आहे. आता या मालिकेत मोठा ट्विस्ट येणार आहे. रेवाचे सत्य सर्वांसमोर येणार असल्याचे समोर आलेल्या प्रोमोमध्ये पाहायला मिळत आहे.
स्टार प्रवाह वाहिनीने इन्स्टाग्रामवर ‘मुरांबा’ मालिकेचा प्रोमो शेअर केला आहे. या प्रोमोच्या सुरुवातीला पाहायला मिळते की, रेवाने रमाला एका खोलीत बांधून ठेवले आहे. तिच्या हातात एक बंदूक आहे. ती बंदूक रेवा रमाच्या डोक्याला लावते आणि म्हणते, “गुड बाय रमा. शेवटी माणुसकी हरते आणि मनी पॉवर जिंकते. तितक्यात पोलिसांचा आवाज येतो. ते तिला म्हणतात, “रेवा, तुला चारही बाजूंनी घेरलंय. स्वत:ला पोलिसांच्या हवाली कर. ते ऐकल्यानंतर रेवाचं मन विचलित होतं. ती विचार करत असते आणि तेवढ्यात रमा संधीचा फायदा घेते. ती रेवाचं लक्ष नसल्याचं पाहत स्वत:ची सुटका करून घेते. रेवाच्या हातातील बंदूक स्वत:च्या हाती घेऊन, तिच्याच डोक्याला लावते. रेवाला म्हणते, “संपला तुझा खेळ.” मग रमा रेवाला धरून, त्या घराबाहेर आणते. बाहेर अक्षय, अभिषेक व कुटुंबातील इतर लोक, तसेच पोलिसही उपस्थित असतात. पोलिस रेवाला नेतात, त्यावेळी ती “सोडा मला”, असे म्हणताना दिसत आहे. रमा अक्षयचा हात हातात घेत म्हणते, “ही रमा-अक्षयच्या प्रेमाची ताकद आहे; ज्यात विजय सत्याचाच झाला.” तिच्या या बोलण्याला अक्षय हसून प्रतिसाद देताना दिसत आहे.
हा प्रोमो शेअर करताना स्टार प्रवाह वाहिनीने, “रमा-अक्षयच्या प्रेमाची ताकद जिंकणार…”, अशी कॅप्शन दिली आहे.
काय म्हणाले नेटकरी?
हा प्रोमो पाहिल्यानंतर प्रेक्षक खूश झाल्याचे पाहायला मिळत आहे. सोशल मीडियावर नेटकऱ्यांनी कमेंट्स करीत प्रतिक्रिया दिल्या आहेत. एका नेटकऱ्याने म्हटले, “वाह! मस्तच अक्षय-रमा.” दुसऱ्या नेटकऱ्याने म्हटले, “रमा-अक्षयचे प्रेम जिंकले. खूप छान झाले. पण, शशिकांत मुकादमलासुद्धा शिक्षा झाली पाहिजे. म्हणजेच पूर्णपणे न्याय मिळाला, असे वाटेल.” आणखी एका नेटकऱ्याने म्हटले, “खूप सुंदर मालिका आहे.” तर, अनेक नेटकऱ्यांनी, ही मालिका संपणार आहे का, असाही प्रश्न विचारला आहे.
दरम्यान, अनेक दिवसांपासून रेवाचे सत्य सर्वांना समजावे यासाठी रमा-अक्षय प्रयत्न करीत होते. त्यासाठी त्यांनी विविध युक्त्या केल्याचेदेखील पाहायला मिळाले. आता अखेर रेवाचे सत्य सर्वांसमोर आले आहे. आता शशिकांत मुकादमलादेखील शिक्षा मिळणार का, यापुढे मालिकेत काय होणार, हे पाहण्यासाठी प्रेक्षक उत्सुक आहेत.
