प्रथमेश लघाटे आणि मुग्धा वैशंपायन हे आजच्या तरुण पिढीतील गायकांपैकी लोकप्रिय गायक आहेत. ‘सा रे ग म प लिटिल चॅम्प्स’मधून प्रेक्षकांच्या भेटीला येत त्यांनी सर्वांकडून कौतुकाची थाप मिळवली, तर त्यानंतर गेली अनेक वर्ष ते या क्षेत्रात उत्तम काम करत आहेत. पण आता त्यांचा एक नवीन व्हिडिओ चांगलाच चर्चेत आला आहे.
काही महिन्यांपूर्वी मुग्धा आणि प्रथमेशने ते दोघं लग्न करणार असल्याचं जाहीर केलं. सोशल मीडियावर सक्रिय राहून ते त्यांच्याबद्दलचे अपडेट्स चाहत्यांना देत असतात. ते दोघं गाण्याचे अनेक कार्यक्रम एकत्र करतातच, त्याबरोबरच ते एकत्र असले की एखादा गाण्याचा व्हिडिओही बनवतात आणि तो सोशल मीडियावर पोस्ट करतात. पण त्यांनी नुकताच पोस्ट केलेला गाण्याचा एक व्हिडिओ नेटकऱ्यांना खटकला.
मुग्धा आणि प्रथमेश यांनी नुकताच त्या दोघांचा गातानाचा एक व्हिडिओ सोशल मीडियावर शेअर केला. यामध्ये मुग्धा गाडी चालवताना दिसत आहे तर प्रथमेश तिच्या बाजूला बसलेला दिसत आहे. गाडीतून प्रवास करताना त्या दोघांनी ‘ओ रंगरेज’ हे गाणं गायलं आणि त्याचा व्हिडिओ सोशल मीडियावर पोस्ट केला. ते दोघेजण नेहमीप्रमाणेच ते गाणं खूप छान गायले पण मुग्धा गाडी चालवत असताना प्रथमेशने हा व्हिडिओ शूट केल्यामुळे नेटकऱ्यांनी त्यांची शाळा घेतली.
त्या दोघांनी गाडी चालवताना हा व्हिडिओ शूट केल्याचं अनेकांना अजिबात आवडलं नाही. तर या व्हिडिओवर नेटकऱ्यांनी तशा कमेंट्स करत त्यांना हे न करण्याचा सल्ला दिला. एकाने लिहिलं, “जे काय करायचं ते गाडी थांबवून करा. नाहीतर ड्राइवर घ्या आणि तुम्ही मस्त लाइव्ह करा. लोकांचं प्रेम आहे तुमच्यावर. त्याची जबाबदारी पण स्वीकारा.” दुसऱ्याने लिहिलं, “अरे बाबांनो… सर्वांनी वर सांगितलंच आहे पण मी पुन्हा सांगतो. जरा गाडी थांबवून चांगला स्पॉट बघून रील करा… भलतं धाडस नको. काळजीने सांगतो आहे, राग मानू नका.”
तर तिसरा नेटकरी म्हणाला, “गाणं गाताना ड्रायव्हिंग करणं हे खूप धोकादायक आहे.” तर आणखी एकाने लिहिलं, “तुम्ही यूथ आयकॉन्स आहात, असा व्हिडिओ बनवू नका, लोक तुम्हाला फॉलो करतात. सेलिब्रेटी म्हणून ही तुमची जबाबदारी आहे.” त्यामुळे आता त्यांच्या गाण्याबरोबरच त्यांच्या या कृतीकडेही सर्वांचं लक्ष वेधलं गेलं आहे.
