“मी बाबांचं ऐकलं नाही…”, निक्की तांबोळीने व्यक्त केली ‘ती’ खंत; ‘सेलिब्रिटी मास्टरशेफ’मध्ये सहभागी होण्याचं सांगितलं कारण

निक्की म्हणते, “जेव्हा एखाद्या शोमध्ये मी एन्ट्री घेते, तेव्हा त्या शोची चर्चा माझ्यामुळेच सुरू होते. माझा आतापर्यंतचा प्रवास खूपच उत्तम झालाय. मी स्वत:ची एक वेगळी ओळख या इंडस्ट्रीत निर्माण केलीये. पण, या क्षेत्रात यायचं ठरवलं तेव्हा या प्रवासात माझ्या जवळचे लोक माझ्यापासून दुरावले…खासकरून माझे बाबा.”

निक्की पुढे म्हणाली, “या इंडस्ट्रीत यायला माझ्या बाबांचा विरोध होता. पण, निक्की ही निक्की आहे ती कधीच कोणाचं ऐकत नाही. तसंच मी तेव्हा त्यांचं ऐकलं नाही. माझे वडील कायमच माझ्यासाठी एका सुपरहिरो राहिले आहेत. पण, जेव्हा हे सुपरहिरो तुमच्या आयुष्यातून दूर जातात तेव्हा एका उडणाऱ्या पाखराचे पंख छाटल्याची भावना मनात येते…आणि याचं मला सर्वात जास्त दु:ख होतं. वडिलांकडून कौतुकाची थाप मिळावी अशी माझी कायम इच्छा असते. माझे बाबा मला बोलावेत की, तू जे काही करते आहेस, ते उत्तम आहे. मला तुझा अभिमान वाटतो. त्या क्षणाची मी आतुरतेने वाट पाहतेय”

“सेलिब्रिटी मास्टरशेफमध्ये मी जे जेवण बनवतेय, आणि यापुढेही मी जे नवनवीन पदार्थ बनवेन हे सगळे प्रयत्न माझ्या कुटुंबीयांसाठी आहेत. माझ्या वडिलांचं आणि माझं नातं पूर्वीसारखं झालं पाहिजे. कारण, ते मला टिव्हीवर पाहतील तेव्हा त्यांना वाटलं पाहिजे माझी निकिता आता परत आलीये. ही तिच निकिता आहे जिला मी लहानपणी जेवण बनवायला शिकवलं, ही भावना माझ्या बाबांच्या मनात निर्माण झाली पाहिजे. मी या शोमध्ये याचसाठी आलीये जेणेकरून आमचं नातं आधीसारखं होईल.” अशी इच्छा निक्कीने यावेळी व्यक्त केली आहे.

दरम्यान, ‘सेलिब्रिटी मास्टरशेफ’ हा शो सोमवार ते शुक्रवारी रात्री ८ वाजता सोनी टिव्हीवर प्रसारित केला जातो. निक्कीने शेअर केलेल्या या पोस्टवर अरबाजने देखील कमेंट करत “तुझ्या सगळ्या इच्छा लवकर पूर्ण होवोत” असं म्हटलं आहे.