‘लागिरं झालं जी’ मालिकेतून घराघरात पोहोचलेला अज्या म्हणजेच अभिनेता नितीश चव्हाण लवकरच नव्या रुपातून प्रेक्षकांच्या भेटीस येत आहे. ‘झी मराठी’ वाहिनीवरील श्वेता शिंदेंची निर्मिती असलेली ‘लाखात एक आमचा दादा’ या नव्या मालिकेत नितीश सूर्यादादाच्या प्रमुख भूमिकेत झळकणार आहे. काही दिवसांपूर्वी अक्षय्य तृतीयेच्या मुहूर्तावर या नव्या मालिकेचा पहिला-वहिला प्रोमो प्रदर्शित झाला होता. त्यानंतर आता मालिकेचा दुसरा दमदार प्रोमो समोर आला आहे. या प्रोमोमधून मालिकेतील सूर्यादादाच्या चार बहिणी कोण असणार आहेत? याचा खुलासा झाला आहे.
‘झी मराठी’ वाहिनीच्या अधिकृत इन्स्टाग्राम पेजवर ‘लाखात एक आमचा दादा’ या नव्या मालिकेचा दुसरा प्रोमो शेअर करण्यात आला आहे. “बहिणींना आईची माया देणारा, गावात देवमाणसाचा मान असणारा…‘लाखात एक आमचा दादा’…नवी मालिका ‘लाखात एक आमचा दादा’ लवकरच…”, असं कॅप्शन लिहित मालिकेचा नवा प्रोमो शेअर केला आहे. प्रोमोची सुरुवात घंटानाद, तुतारीबरोबर ‘येळकोट येळकोट जय मल्हार’च्या जषघोषाने होतं आहे. त्यानंतर सूर्यादादाच्या चार बहिणींची झलक पाहायला मिळत आहे. त्याच्या मागे दादाचं वर्णन करणार मालिकेचं सुंदर शीर्षकगीत सुरू आहे. अशा या ‘लाखात एक आमचा दादा’ नव्या मालिकेच्या नव्या प्रोमोने सगळ्यांचं लक्ष वेधलं आहे.
नव्या मालिकेत सूर्यादादाच्या चार बहिणींची नावं तेजश्री, राजश्री, भाग्यश्री आणि धनश्री अशी आहेत. अभिनेत्री कोमल मोरे (तेजश्री), समुद्धी साळवी (धनश्री), इशा (राजश्री), जुई तनपुरे (भाग्यश्री) या चारजणी बहिणींच्या भूमिकेत पाहायला मिळणार आहेत. अद्याप ‘लाखात एक आमचा दादा’ नव्या मालिकेची सुरू होण्याची तारीख आणि वेळ जाहीर करण्यात आलेली नाही. पण मालिकेच्या दमदार प्रोमोने प्रेक्षकांची उत्सुकता वाढली आहे.
हेही वाचा – “म्हारी छोरियां छोरों से कम हैं के…”, पुतणी १२ वी पास झाल्यावर संतोष जुवेकरची पोस्ट, म्हणाला…
हेही वाचा – दुसऱ्यांदा होणार अनंत अंबानी-राधिका मर्चंटचा प्री-वेडिंग सोहळा, ठिकाणही ठरलं; वाचा पाहुण्यांची यादी
दरम्यान, ‘लाखात एक आमचा दादा’ नव्या मालिकेत ‘लागिरं झालं जी’मधील आणखी एक अभिनेता झळकणार आहे. ‘लागिरं झालं जी’ मालिकेत पाहायला मिळालेला ‘टॅलेंट’ म्हणजेच अभिनेता महेश जाधव नव्या मालिकेत दिसणार आहे. याशिवाय ‘राजा रानीची गं जोडी’ मालिकेतील संजीवनीची मैत्रीण आणि ‘मन झालं बाजिंद’ मधील कृष्णा म्हणजेच अभिनेत्री श्वेता खरात ‘लाखात एक आमचा दादा’ झळकणार आहे. यासंदर्भात ‘मराठी टीव्ही इन्फो’ इन्स्टाग्राम पेजवर काही दिवसांपूर्वी पोस्ट शेअर करण्यात आली होती. त्यामुळे आता या नव्या मालिकेतील नितीश व श्वेता ही नवी जोडी प्रेक्षकांची मनं जिंकते की नाही? भावा आणि बहिणींची ही सुंदर कथा प्रेक्षकांना आवडते की नाही? हे पाहणं महत्त्वाचं असणार आहे.
