निवेदिता सराफांना ‘जीवनगौरव’ पुरस्कार मिळताच सचिन व सुप्रिया पिळगांवकरांनी व्यक्त केला आनंद, म्हणाले, “संपूर्ण कुटुंब…”

अनेक मालिका, चित्रपट, नाटकांच्या माध्यमातून गेली वर्षानुवर्षे निवेदिता सराफ रसिक प्रेक्षकांचं भरभरून मनोरंजन करत आहेत. कलाविश्वातील हे योगदान लक्षात घेऊन यंदाच्या ‘झी चित्र गौरव’ पुरस्कार सोहळ्यात निवेदिता सराफ ( Nivedita Saraf ) यांचा जीवनगौरव या पुरस्काराने सन्मान करण्यात आला. यानिमित्त त्यांच्यावर चाहते वर्गासह कलाकार मंडळींकडूनही कौतुकाचा वर्षाव होत आहे. अशातच निवेदिता ( Nivedita Saraf ) यांच्या ‘जीवनगौरव’ पुरस्कारानिमित्त सचिन व सुप्रिया पिळगांवकरांनीही ( Sachin And Supriya Pilgaonkar ) त्यांचे कौतुक केलं आहे. राजश्री मराठीला दिलेल्या मुलाखतीत त्यांनी आमच्या घरात दोन जीवनगौरव पुरस्कार आल्याची भावना व्यक्त केली.

नेमकं काय म्हणाले सचिन व सुप्रिया पिळगांवकर?

याबद्दल सचिन पिळगांवकर ( Sachin Pilgaonkar ) असं म्हणाले की, “आमच्या कुटुंबात आलेला हा दुसरा जीवनगौरव आहे. आमच्या कुटुंबात पहिला जीवनगौरव मिळाला तो अशोक सराफला. त्यानंतर आता दुसरा निवेदिताला मिळाला आहे”. पुढे सुप्रिया पिळगांवकर ( Supriya Pilgaonkar ) म्हणाल्या की, “हे वर्षच खूप खास होतं. अशोक भाईंना ( Ashok Saraf ) ‘महाराष्ट्र भूषण’ मिळालं, नंतर ‘पद्मश्री’ मिळालं आणि आता निवेदिताला ‘जीवनगौरव’ हा पुरस्कार मिळाला आहे, त्यामुळे आमचं संपूर्ण कुटुंब खूप खूश आहे. आम्ही अगदी आनंदात न्हाऊन निघालो आहोत.”

दरम्यान, सुप्रिया पिळगांवकर ( Supriya Pilgaonkar ) या लाडक्या मैत्रिणीच्या हस्ते निवेदिता यांना ‘जीवनगौरव’ पुरस्कार प्रदान करण्यात आला. यानंतर निवेदिता यांना मंचावर आमंत्रित करण्यात आलं, तेव्हा त्यांनी “काय बोलू, मी खूप भावनिक झालीये. हा पुरस्कार खरंतर माझ्या माहेरचा पुरस्कार आहे” अशा शब्दांत भावना व्यक्त केल्या. येत्या ८ मार्च रोजी ‘झी चित्र गौरव पुरस्कार २०२५’ ( Zee Gaurav Awards 2025 ) हा पुरस्कार सोहळा प्रेक्षकांना पाहता येणार आहे.