“प्रत्येक माणसाबद्दल…”, ‘पारू’ फेम श्वेता खरातने सांगितला हर्षदा खानविलकर यांच्याबरोबर काम करण्याचा अनुभव; म्हणाली…

मी आतापर्यंत हर्षदाताईबद्दल ऐकलं होतं की…

अभिनेत्री श्वेता खरातने नुकताच अल्ट्रा मराठी बझबरोबर संवाद साधला. यावेळी हर्षदा खानविलकर व तुषार दळवी यांच्याबरोबर काम करण्याचा अनुभव कसा होता? अशा आशयाचा प्रश्न विचारण्यात आला. यावर बोलताना श्वेता खरातने म्हटले की, ते दोघेही खूप सकारात्मक आहेत. कारण-मी आतापर्यंत हर्षदाताईबद्दल ऐकलं होतं की ती प्रेमळ व्यक्तींपैकी एक आहे आणि खरंच ती खूप प्रेमळ आहे, खूप काळजी घेते. प्रत्येक माणसाबद्दल तिला प्रेम आहे. ती प्रत्येकाशी प्रेमाने वागते, काळजी घेते. आमचं जर आऊटडोअर शूट असेल तर कोणी उन्हात असेल तर ती त्यांना छत्री द्यायला सांगते. तिचं सगळीकडे लक्ष असतं. ती इतकी शांतपणे बोलते की असं वाटतंच नाही की पहिल्यांदा भेट होतेय. तसंच तुषार सरांबरोबर आहे. त्यांच्याबरोबर छान गप्पा सुरू असतात.”

श्वेता खरातने पारू मालिकेत अनुष्काची भूमिका साकारली आहे. आता अनुष्का व आदित्यचा साखरपुडा पार पडणार आहे. अहिल्यादेवीने तिला आदित्यसाठी निवडले आहे. मात्र, अनुष्काने हे सर्व घडवून आणले आहे. याबरोबरच पारूसुद्धा आदित्यला तिचा नवरा मानते, त्यामुळे मालिकेत पुढे काय होणार, हे पाहण्यासाठी प्रेक्षक उत्सुक आहेत.

दरम्यान, लक्ष्मी निवास ही मालिका काही दिवसांपूर्वीच प्रेक्षकांच्या भेटीला आली आहे. या मालिकेत हर्षदा खानविलकर, तुषार दळवी मुख्य भूमिकेत दिसत आहेत.