‘पारू’ (Paaru) मालिका वेगळ्या कथानकामुळे प्रेक्षकांच्या पसंतीस उतरताना दिसत आहे. अहिल्यादेवीच्या घरी नोकर म्हणून काम करणारी गरीब घरातील मुलगी पारू प्रेक्षकांचे मन जिंकताना दिसते. आपल्या प्रेमळ स्वभावाने पारू अहिल्यादेवीच्या घरातील सर्वांची लाडकी होते. आदित्यला वेळोवेळी मदतदेखील करते आणि त्याच्या प्रेमात पडते. एका जाहिरातीसाठीच्या शूटिंगमध्ये आदित्य तिला मंगळसूत्र घालतो आणि पारू ते सर्व सत्य समजते. त्यानंतर ती आदित्यला नवरा मानते आणि घरातील मोठी सून म्हणून सर्व कर्तव्य पार पाडते. मात्र, आदित्य किंवा इतर कोणालाही याबद्दल कोणतीही कल्पना नसून तो तिला फक्त चांगली मैत्रीण मानतो. आता झी मराठीने या मालिकेचा एक प्रोमो शेअर केला आहे. यामध्ये पारू पुन्हा एकदा घरची मोठी सून होण्याचे कर्तव्य पार पाडणार असल्याचे दिसत आहे.
प्रीतम व प्रियाचा तो संवाद ऐकताच पारूने घेतला निर्णय
झी मराठीने इन्स्टाग्रामच्या अधिकृत अकाउंटवर एक प्रोमो शेअर केला आहे, ज्यामध्ये प्रिया प्रीतमला ऑफिसला जाण्याबाबत सांगताना दिसत आहे. ती म्हणते, “आदित्य सर आणि मोहन काका जातात ना दररोज ऑफिसला, मग आता तुम्हीसुद्धा जायचं.” त्यावर प्रीतम म्हणतो, “मी काय करू ऑफिसला जाऊन?” प्रिया म्हणते, “हा बिझनेस तुमचासुद्धा आहे, तुम्हाला माहीत पाहिजे ना सगळं? त्यांचा हा संवाद पारू ऐकत आहे. त्यानंतर पारू म्हणते, “पण, माझ्या मनासाठी तरी या घरची मोठी सून म्हणून किर्लोस्कर कुटुंब हे इथून पुढे एकत्र दिवाळी साजरी करणार, ही जबाबदारी या पारूची.”
झी मराठीने हा प्रोमो शेअर करताना, “पारू किर्लोस्कर कुटुंबाला दिवाळी साजरी करण्यासाठी एकत्र आणणार…!”, अशी कॅप्शन दिली आहे.
दरम्यान, मालिकेत दाखवल्याप्रमाणे प्रीतम आणि प्रियाचे नुकतेच लग्न झाले आहे. आता अहिल्यादेवीला आदित्यसाठी मुलगी शोधायची आहे, त्यासाठी ती प्रयत्न करताना दिसते. आता मालिकेत पुढे काय होणार, पारू आदित्यला तिचा नवरा मानते ही गोष्ट सगळ्यांना कळणार का हे पाहणे महत्त्वाचे ठरणार आहे.
