परेश रावल हे बॉलीवूडमधील दिग्गज अभिनेते आहेत. त्यांनी आजवर अनेक चित्रपटांतून प्रेक्षकांचं मनोरंजन केलं आहे. परेश स्वतःचं मत कायम निर्भीडपणे मांडत असतात. राजकीय भूमिका घेणं किंवा मत मांडणं यामुळे परेश रावल हे कायम चर्चेत असतात. मुंबईत एका गुजराती कुटुंबात जन्मलेल्या परेश यांना लहानपणापासूनच नाटकाची आवड होती. १९७४ मध्ये कॉलेजचं शिक्षण घेत असतानाच त्यांनी नाटकात काम करायला सुरुवात केली.
चित्रपटातून प्रसिद्धी मिळाल्यानंतरही परेश रावल यांचं नाटकावरील प्रेम कमी झालेलं नाही. आजही त्यांना कोणत्याही मुलाखतीमध्ये जेव्हा नाटकाबद्दल किंवा रंगभूमीबद्दल विचारणा होते तेव्हा ते त्याबद्दल भरभरून बोलतात. नुकतंच परेश रावल यांनी ‘कोण होणार करोडपती’ या मराठी रियालिटी शोमध्ये हजेरी लावली. या वेळी त्यांच्यासह नाटकाची सेंचुरी पार करणारे मराठी दिग्दर्शक विजय केंकरेसुद्धा उपस्थित होते. या कार्यक्रमात त्यांनी मनमोकळ्या गप्पा मारल्या. याच कार्यक्रमात परेश रावल यांनी मराठी नाटकात काम न करण्यामागचं कारण सांगितलं आहे.
मराठी नाटकात आजपर्यंत काम का केलं नाही यावर ते म्हणाले, “मला मराठी भाषेचा तितका सराव नाही. मी या भाषेचा खूप आदर करतो. मी काही चुकीचं बोललो तर ते पाप होईल असं मला वाटतं. जर मी सराव केला तर नक्कीच मराठी नाटकात काम करू शकतो. पण चुकीचं बोलायला नको म्हणून मी यापासून थोडं लांबच असतो.”
हेही वाचा- संकर्षण कऱ्हाडे गडबडीत चढला होता लेडीज डब्यात आणि… ; अभिनेत्याने शेअर केला ‘तो’ किस्सा
मराठी नाटकाबाबतही परेश रावल यांनी भावना व्यक्त केल्या आहेत, ते म्हणाले. “मराठी रंगभूमी ही सतत काही ना काही तरी नवीन देत आली आहे. नावीन्यपूर्ण आणि दर्जेदार नाटकं मराठीत पाहायला मिळतात. शिवाय मराठी नाटकांचा जो दर्जा असतो त्यातून बरंच काही शिकायला मिळतं.”
