‘सारेगमप लिटिल चॅम्प्स’ या कार्यक्रमाच्या पहिल्या पर्वातून आपल्या सुरेल आवाजाने मनं जिंकणाऱ्या पंचरत्नांपैकी एक म्हणजे प्रथमेश लघाटे. लहानपणापासून गाण्याची गोडी लागलेला प्रथमेश लघाटे आता एक उत्कृष्ट गायक आहे. अभंग, भावगीते, भक्तीगीते प्रथमेश उत्तम गातो. त्याच्या आवाजाचा मोठा चाहता वर्ग आहे. अशा या लोकप्रिय गायकाचं भक्तीगीत बॉलीवूड अभिनेत्री अदा शर्मानं गायलं होतं; जे ऐकून प्रथमेश भारावून गेला.
२०२१मध्ये प्रथमेश लघाटेचं ‘अंतरी माझ्या श्रीराम’ हे भक्तीगीत प्रदर्शित झालं होतं. या भक्तीगीतासाठी फक्त त्याने आवाज दिला नव्हता, तर तबला, ताल वाद्य, तालवाद्य संयोजन, मिक्सिंग, मास्टरींग, सिनेमॅटोग्राफी, व्हिडीओ ए़डिटिंग या सर्व जबाबदारी उत्तमरित्या पेलल्या होत्या. हेच भक्तीगीत अभिनेत्री अदा शर्माने गायलं होतं. याचा व्हिडीओ आज प्रथमेश लघाटेने इन्स्टाग्राम स्टोरीवर शेअर केला आहे.
प्रथमेशने अदाचा व्हिडीओ शेअर करत मूळ भक्तीगीताच्या व्हिडीओची लिंक दिली आहे. तसंच अदाला स्टोरी टॅग करून त्याच्यापुढे फुलाचा व हात जोडण्याचा इमोजी दिला आहे.
हेही वाचा – KGF फेम यशने नाकारली ‘रामायण’तील रावणाची भूमिका अन् ८० कोटींची ऑफर, आता दिसणार ‘या’ महत्त्वाच्या भूमिकेत
अदाच्या या व्हिडीओला ५ लाखांहून अधिक लाइक्स आहेत. तर ४९ लाखांहून अधिक व्ह्यूज आणि ४ हजारांहून अधिक प्रतिक्रिया अदाच्या व्हिडीओला आहेत. तसंच प्रथमेशने गायलेल्या मूळ भक्तीगीताला युट्यूबवर १२ लाखांहून अधिक व्ह्यूज आहेत. तर २२ हजारांहून अधिक लाइक्स आहेत.
