‘प्रेमाची गोष्ट’ या मालिकेत सध्या मुक्ता-सागरच्या लग्नाचा सीक्वेन्स सुरू आहे. दमदार स्टारकास्ट आणि उत्तम कथेच्या जोरावर या मालिकेने अल्पावधीतच प्रेक्षकांचं मन जिंकलं आहे. ‘प्रेमाची गोष्ट’ मध्ये तेजश्री प्रधानने ‘मुक्ता’, राज हंचनाळेने ‘सागर’, तर अपूर्वा नेमळेकरने सईच्या आईची म्हणजेच ‘सावनी’ची नकारात्मक भूमिका साकारली आहे. सईच्या कस्टडीवरून मालिकेत मुक्ता-सागर व कोळी कुटुंबाचे सावनीबरोबर नेहमीच वाद होत असतात. त्यामुळे ऑनस्क्रीन सतत वाद होणाऱ्या सावनी आणि मुक्ताचं ऑफस्क्रीन नातं कसं आहे याबद्दल प्रेक्षकांच्या मनात प्रचंड उत्सुकता होती.
‘प्रेमाची गोष्ट’ मालिकेतील प्रमुख कलाकारांनी अलीकडेच इन्स्टाग्राम लाइव्ह सेशनमध्ये त्यांच्या चाहत्यांशी संवाद साधला. मालिकेत येणारे आगामी ट्विस्ट, सईची कस्टडी, प्रेक्षकांचं मिळणारं प्रेम आणि मुक्ता-सागरचं लग्न याबाबत या लाइव्ह सेशनमध्ये चर्चा करण्यात आली. तेजश्री प्रधान चाहत्यांशी संवाद साधत असताना अचानक अपूर्वा नेमळेकर म्हणजेच सावनी येते. यावेळी तेजश्री तिला जवळ बोलवून घेते आणि प्रेक्षकांना दोघींमध्ये ऑफस्क्रीन बॉण्डिंग नेमकं कसं आहे याची माहिती देते. सध्या अभिनेत्रीच्या लाइव्ह सेशनमधील हा व्हिडीओ सोशल मीडियावर प्रचंड व्हायरल होत आहे.
हेही वाचा : शर्मिष्ठा राऊतने अक्षराला घेतलं उचलून; ‘तुला शिकवीन चांगलाच धडा’च्या सेटवर नेमकं काय घडलं? फोटो आला समोर
तेजश्री या व्हिडीओमध्ये अपूर्वाला म्हणते, “तू इथे माझ्याबरोबर उभी राहा…कारण, प्रेक्षकांना आपलं असं बॉण्डिंग कधीच पाहायला मिळत नाही. आम्ही ऑनकॅमेरा काही वागत असलो, तरीही ऑफकॅमेरा आमची केमिस्ट्री खूपच सुंदर आहे.”
“लग्नाच्या सगळ्या सीक्वेन्स तुम्ही जो प्रतिसाद दिलात त्याबद्दल तुमचे खूप खूप आभार… मुक्ता-सागरच्या लग्नानंतर आता खऱ्या अर्थाने मालिकेची मुख्य गोष्ट सुरू होईल. मालिकेत पुढे तुम्हाला अजून नवनवीन ट्विस्ट पाहायला मिळतील. तसेच यापुढे तुम्हाला सावनी आणि मुक्ताचे अनेक सीन्स तुम्हाला एकत्र दिसतील. त्यामुळे तुम्ही असंच प्रेम कायम ठेवा.” असं तेजश्रीने इन्स्टा लाइव्हमध्ये सांगितलं. हा व्हिडीओ इन्स्टाग्राम लाइव्ह सेशनचा असल्याने तेजश्री प्रधानच्या फॅनपेजवरून शेअर करण्यात आला आहे.
हेही वाचा : ‘प्रेमाची गोष्ट’ मालिकेत सईमुळे येणार मोठा ट्विस्ट, मुक्ता-सागरसह कोळी कुटुंबाच्या पायाखालची जमीन सरकणार
दरम्यान, ‘प्रेमाची गोष्ट’ ही मालिका स्टार प्रवाह वाहिनीवर दररोज रात्री ८ वाजता प्रसारित केली जाते. यामध्ये तेजश्री प्रधान, राज हंसनाळे आणि अपूर्वा नेमळेकर यांच्या व्यतिरिक्त शुभांगी गोखले, संजीवनी जाधव या कलाकारांनी मुख्य भूमिका साकारल्या आहेत.
