‘महाराष्ट्राची हास्यजत्रा’ हा छोट्या पडद्यावरील सर्वाधिक लोकप्रिय ठरलेला कार्यक्रम आहे. या कार्यक्रमातला प्रत्येक विनोदवीर आता घराघरात पोहोचला आहे. प्रत्येकाने प्रेक्षकांच्या मनात आपल्या विनोद शैलीमुळे वेगळं स्थान निर्माण केलं आहे. त्यामुळे प्रेक्षकही या विनोदवीरांवर भरभरून प्रेम करताना पाहायला मिळत आहे. पण अशा या लोकप्रिय कार्यक्रमात एक चिडका बिब्बा आहे. तो कोण? याचा खुलासा अभिनेते समीर चौघुले यांनी केला आहे.
हेही वाचा – भक्ती बर्वे: ‘सळसळत्या ऊर्जेची फुलराणी’
‘मज्जा’ या एंटरटेन्मेंट यूट्युब चॅनेलच्या पोलखोल या सेगमेंटमध्ये समीर चौघुले यांनी ‘महाराष्ट्राची हास्यजत्रा’मध्ये कोण चिडका बिब्बा आहे? याबाबत सांगितलं. समीर चौघुले म्हणाले की, “‘महाराष्ट्राची हास्यजत्रा’मध्ये चिडका बिब्बा पृथ्वीक प्रताप आहे. कारण तो पटकन चिडतो, त्याला कळतं नाही. मग त्याला समजवावं लागतं, शांत हो. चिडू नकोस. शांत हो. रिलॅक्स. विशेषतः जे मीडियासमोर जाण्याची शक्यता तिथे जरा शांत बोल. कारण काय असतं हल्ली एखादा सेलिब्रिटी बोलतोय आणि त्याचा अर्थ वेगळा काढणारी अनेक मंडळी आहेत. तेवढा एक पॅच हायलाइट करतात आणि लोक त्या पद्धतीने ट्रोल करतात. हे होऊ नये कारण तो फार ब्रिलियंट आहे. अत्यंत गुणी कलावंत आहे. त्यामुळे चिडताना त्यानं स्वतःला आवरलं तर खूप चांगलं होईल.”
दरम्यान, पृथ्वीक हा शाहरुख खानचा जबरा फॅन आहे. त्यानं नुकताच ‘जवान’ चित्रपटातील शाहरुखचा टक्कल असलेला लूक रीक्रिएट केला होता. या लूकमध्ये शाहरुख चित्रपटात मेट्रोमध्ये ‘बेकरार करके हमे..’ गाण्यावर डान्स करताना दिसतो. तसाच डान्स पृथ्वीकने केला होता. याचा व्हिडीओ सोशल मीडियावर चांगलाच व्हायरल झाला होता.
