बॉलीवूडची ड्रामा क्वीन राखी सावंत अनेकदा वेगवेगळ्या कारणांमुळे चर्चेत असते. मे महिन्यात अचानक राखीची प्रकृती खालावली होती आणि तिच्या गर्भाशयात ट्यूमर असल्याचं समोर आलं होतं. यादरम्यान राखीचे व्हिडीओ सोशल मीडियावर व्हायरल होतं होते.
एका बाजूला राखीची प्रकृती बिघडली होती. आता २ महिन्यानंतर राखीने तिच्या प्रकृतीबद्दल खुलासा केला आणि ती कधीच आई होऊ शकणार नाही असं सांगितलं.
नुकत्याच टेली टॉकला दिलेल्या मुलाखतीत राखी म्हणाली, “खूप वेदना आहेत आयुष्यात पण आता त्याचा सामना करावाच लागेल. मी आता कधीच आई होऊ शकत नाही. आता मी सरोगसीचा विचार करेन. कारण मी मुलाला दत्तक नाही घेऊ शकत.”
राखी पुढे म्हणाली, “मी विकी डोनरसारख काहितरी प्लॅन करेन. वारसा चालवायला कोणतरी हवं ना आयुष्यात.” राखीने असंही सांगितलं की, तिच्या पोटात दहा सेंटीमीटरचा ट्यूमर सापडला. सर्जरी करून डॉक्टरांना पूर्ण गर्भाशय काढावं लागलं आणि यामुळेच ती आई होऊ शकणार नाही. तरी, डॉक्टरांना आधी असं वाटलं होतं की, राखीला हृदयविकाराचा झटका आला आहे पण तपास केल्यानंतर तिच्या ट्यूमरबद्दल कळलं.
राखीने या गोष्टीचा सगळा दोष तिचा पूर्वाश्रमीचा पती आदिल खान दुर्रानीवर टाकला आणि सांगितलं की, त्याने मला उद्ध्वस्त केलं. राखी म्हणाली की, “त्याने माझा फोन हॅक केला, स्वत:चे न्यूड व्हिडीओ लीक केले आणि माझ्यावरच केस टाकली. माझे सगळे पैसे तो घेऊन गेला. त्यानेच माझी बदनामी केली.”
राखीने आदिलबरोबर निकाह करण्यासाठी स्वत:चा धर्मदेखील बदलला होता. तिने आपलं नाव बदलून फातिमा ठेवलं होतं, पण आदिलने तिला धोका दिला असं तिचं म्हणणं आहे.
दरम्यान, राखीच्या वैयक्तिक आयुष्याबाबत सांगायचं झालं, तर आदिल खानच्या आधी राखीनं रितेशशी लग्न केलं होतं. या दोघांनी ‘बिग बॉस १५’ मध्ये सहभाग घेतला होता; पण काही कारणांमुळे फेब्रुवारी २०२२ मध्ये शो संपल्यानंतर ते दोघं लगेचच वेगळे झाले. रितेशपासून विभक्त झाल्यानंतर राखीनं आदिल खानशी लग्न केलं. परंतु, २०२३ मध्ये दोघं वेगळे झाले. नंतर आदिलने अभिनेत्री सोमी खानशी गुपचूप लग्न केलं.
