हिंदी मनोरंजनसृष्टीत ड्रामा क्वीन म्हणून ओळखली जाणारी अभिनेत्री राखी सावंत नेहमीच कोणत्या ना कोणत्या कारणाने चर्चेत असते. काही महिन्यांपूर्वी तिच्या आईचे निधन झाले, तर त्यानंतर तिच्या वैवाहिक जीवनात अडचणी सुरू झाल्या. आता तिचा पती आदिल तुरुंगात आहे. अशातच राखीचा एक नवीन व्हिडिओ खूप चर्चेत आला आहे.
राखी नेहमीच तिच्या वागण्याने सर्वांचं लक्ष वेधून घेत असते. तिच्या अतरंगीपणामुळे अनेकदा तिला ट्रोलही केलं जातं. आता राखीला तिचा शेहजादा भेटला असल्याचं तिने सांगितलं. तिचा हा शहजादा तिला दुबईमध्ये भेटला. त्या दोघांचा एक व्हिडीओ सध्या फार व्हायरल होत आहे.
या व्हायरल होत असणाऱ्या व्हिडीओमध्ये ती एका व्यक्तीचा हात धरून चालताना दिसत आहे. ती म्हणते, “या हबीबी… राखी सावंतला मिळाला तिचा हबीबी. हे अरबीजी आहेत. मी दुबईत आले आणि मला माझा शहजादा मिळाला.” याचबरोबर या व्हिडीओमध्ये ती त्यांना अरबी भाषेत तिचं कौतुकही करायला सांगते. या व्हिडीओमध्ये तिने त्यांना हाताला धरून गोलही फिरवलं आणि व्हिडीओच्या शेवटी ती त्यांचा हात पकडून त्यांच्याबरोबर निघून गेली.
हेही वाचा : “सर्व धर्मांची थट्टा…”; राखी सावंतकडून मोडला गेला रोजा, कारण ऐकताच संतापले नेटकरी
तिचा हा व्हिडीओ व्हायरल होताच नेटकऱ्यांनी विविध प्रतिक्रिया द्यायला सुरुवात केली. एकाने लिहिलं, “ते लहान मूल नाही की तू त्याला गोल फिरवतेस.” तर दुसरा नेटकरी म्हणाला, “राखीचा होणारा पती.” तर आणखी एक म्हणाला, “हिला अजून किती हबीबी हवेत!” तर एकाने लिहिलं, “नवीन बकरा मिळाला.” आता तिचा हा व्हिडीओ खूप चर्चेत आला आहे.
