Ram Kapoor Weight Loss Journey : छोट्या पडद्यावरील लोकप्रिय अभिनेता राम कपूरने अलीकडेच त्याच्या इन्स्टाग्राम अकाउंटवर त्याचे फोटो शेअर करून खळबळ उडवून दिली होती. त्याच्या बॉडी ट्रान्सफॉर्मेशनने सर्वांनाच आश्चर्यचकित केले. त्याने तब्बल ५५ किलो वजन कमी केले असल्याची माहिती दिली होती. आता त्याने त्याच्या या वजन घटवण्याच्या प्रवासावर (वेट लॉस जर्नीवर) भाष्य केले असून त्याचे वजन १४० किलो होते, हेही उघड केले आहे.
वजन कमी करण्याचा प्रवास
‘ईटाइम्सला’ दिलेल्या मुलाखतीत राम कपूरने त्याच्या वेट लॉस जर्नीबद्दल सांगितले. त्याने सांगितले की, त्याचे वजन जास्त असतानाही प्रेक्षकांनी त्याला खूप प्रेम दिले. तो म्हणाला, ” ‘नीयत’ चित्रपट आणि ‘जुबली’ सीरिजच्या शूटिंगदरम्यान माझे वजन १४० किलो होते. या भूमिका माझ्या शरीरच्या आकाराला अनुकूल होत्या, पण मला माहिती होते की मी अस्वस्थ आहे. फक्त २० पावले चालल्यानंतर माझा श्वास फुलायचा आणि मला डायबेटिससारखे आजार होते. माझ्या पायाला दुखापत झाली होती, ज्यामुळे हलणंही खूप कठीण झालं होतं.” असे तो म्हणाला.
राम कपूरने केले अफवांचे खंडन
राम कपूरने सर्जरी करून किंवा औषधे घेऊन वजन कमी केले आहे, असे काही लोकांचे म्हणणे होते. मात्र, राम कपूरने या अफवांचे खंडन केले. त्याने स्पष्ट केले की, सर्जरी किंवा कोणत्याही बाह्य उपायांशिवाय त्याने स्वतःची मानसिकता, जीवनशैली आणि सवयी बदलून पारंपरिक पद्धतीने वजन कमी केले आहे. दृढ संकल्पामुळे त्याने त्याचे वजन ८५ किलोपर्यंत कमी केले.
कायमस्वरूपी बदलाचा निर्णय
‘कसम से’ या मालिकेतील अभिनेता राम कपूरने मान्य केले की, त्याने याआधी दोनदा ३० किलो वजन कमी केले होते, पण त्याचे वजन पुन्हा वजन वाढले. मात्र, यावेळी त्याने हा बदल कायमस्वरूपी करण्याचा निर्णय घेतला. त्यासाठी त्यांनी आपले खाणे-पिणे, झोप, व्यायाम, हायड्रेशन आणि उपवास यावर लक्ष केंद्रित केले. “माझ्या जुन्या अवस्थेबद्दल मी खूप असमाधानी होतो. भावनिकदृष्ट्या खूप खालावल्यावर मी पुन्हा स्वतःला तयार करण्याचा निर्णय घेतला,” असे त्याने सांगितले.
आता तरुण असल्यासारखे वाटते
राम कपूरने पुढे सांगितले की, “आता मला स्वतःचे वय २५ वर्षे असल्यासारखे वाटते आणि आता मी १२ तास न थांबता सतत चालू शकतो.”
वेब सीरिजमध्ये झळकणार राम कपूर?
आपल्या भविष्यातील योजनांबद्दल सांगताना राम कपूरने म्हटले की, “माझ्या ट्रान्सफॉर्मेशनसहच माझ्या भूमिका देखील बदलत आहेत. पुढील वर्षी मी एका वेब सीरिजमध्ये एक तरुण पात्र साकारणार आहे.”
