Shivani Sonar & Ambar Ganpule Wedding : मराठी टेलिव्हिजन विश्वात गेल्या काही दिवसांपासून शिवानी सोनार आणि अंबर गणपुळे यांच्या लग्नाची जोरदार चर्चा सुरू आहे. कलाविश्वातील हे स्टार कपल नुकतंच लग्नबंधनात अडकलं आहे. या दोघांच्या लग्नाला सिनेविश्वातील बऱ्याच कलाकारांनी उपस्थिती लावली होती. या दोघांच्या लग्न सोहळ्यातील अनेक फोटो आणि व्हिडीओ आता सोशल मीडियावर व्हायरल होत आहेत.
शिवानी-अंबरने गेल्यावर्षी गुढीपाडव्याच्या शुभमुहूर्तावर साखरपुडा केला होता. यानंतर दोघांचेही चाहते ही जोडी लग्नबंधनात केव्हा अडकणार याची आतुरतेने वाट पाहत होते. ग्रहमख, मेहंदी, हळद, संगीत सोहळा असे सगळे विधी पार पडल्यावर शिवानी-अंबरने लग्नगाठ बांधली आहे. या दोघांच्या लग्नाला मराठी कलाविश्वातील बरेच कलाकार उपस्थित होते.
स्पृहा जोशी, रुमानी खरे, रेश्मा शिंदे, अनघा अतुल, आशुतोष गोखले, हर्षदा खानविलकर, ‘रंग माझा वेगळा’ मालिकेचे दिग्दर्शक, शुभांगी गोखले, श्रीकांत यादव, सुमीत पुसावळे व त्याची पत्नी असे सगळे सेलिब्रिटी या जोडप्याच्या लग्नाला उपस्थित होते. ‘रंग माझा वेगळा’च्या टीमने नवरा-नवरीसह यावेळी छानसा सेल्फी सुद्धा काढला. यापूर्वी या सगळ्यांनी मिळून अंबर-शिवानीचं थाटामाटात केळवण केलं होतं. आता ही सगळी टीम या जोडप्याच्या लग्नाला सुद्धा उपस्थित राहिल्याचं पाहायला मिळत आहे.
शिवानी सोनार व अंबर गणपुळे यांनी सप्तपदी घेताना पारंपरिक लूक केला होता. तर लग्न लागताना ही जोडी इंडो-वेस्टर्न लूकमध्ये दिसत आहे. या दोघांनी आपल्या नावांची फोड करुन अलीकडच्या ट्रेंडनुसार लग्नसोहळ्यात खास ‘#AmbAni Wedding’ हा हॅशटॅग वापरला होता.
सध्या कलाविश्वातून शिवानी आणि अंबरवर कौतुकाचा वर्षाव करण्यात येत आहे. दरम्यान, या दोघांच्या कामाबद्दल सांगायचं झालं, तर अंबरने आतापर्यंत ‘रंग माझा वेगळा’ (Rang Maza Vegla ) आणि ‘कलर्स मराठी’ची मालिका ‘दुर्वा’ यामध्ये महत्त्वाच्या भूमिका साकारल्या आहेत. तर, शिवानी ‘राजा राणीची गं जोडी’ आणि ‘तू भेटशी नव्याने’ अशा मालिकांमध्ये मध्यवर्ती भूमिकेत झळकली आहे.
