छोट्या पडद्यावरील सुप्रसिद्ध अभिनेत्री रुबीना दिलैक सध्या एका वेगळ्याच कारणामुळे चर्चेत आहे. शनिवारी (१० जून) रुबीनाबरोबर एक विचित्र घटना घडली. तिचा कार अपघात झाला. याबाबत रुबीनाचा पती अभिनेता अभिनव शुक्लाने ट्वीट करत माहिती दिली. त्याचबरोबरीने अभिनवने कारचे फोटोही सोशल मीडियाद्वारे शेअर केले. या अपघातामध्ये रुबीनाला कोणतीच दुखापत झाली नाही, मात्र या घटनेचा तिला धक्का बसला असल्याचं अभिनवने सांगितलं. आता रुबीनाने यावर भाष्य केलं आहे.
रुबीनाने ट्वीट करत घडलेल्या प्रकाराबाबत भाष्य केलं. तसेच तिची प्रकृती कशी आहे हेही तिने सांगितलं. अभिनवने शेअर केलेली पोस्ट रिट्वीट करत रुबीना म्हणाली, “पाठ व डोक्याच्या खालच्या बाजूला मला दुखापत झाली. सध्या तरी मी या धक्क्यामधून सावरली नाही. काही वैद्यकीय टेस्ट केल्या आहेत. आता सर्वकाही ठिक आहे”. शिवाय या अपघाताची माहितीही रुबीनाने दिली.
ती म्हणाली, “निष्काळजी ट्रकचालकावर कारवाई करण्यात आली आहे. पण नुकसान झालं आहे. तुमच्या व आमच्या सुरक्षिततेसाठी रस्त्यांच्या नियमांचे पालन करा”. रुबीनाने ट्वीटच्या माध्मातून सगळ्यांना ड्रायव्हिंग करताना नियमांचे पालन करण्याची विनंती केली आहे. पण सध्या तरी या घटनेमधून ती सावरली नाही. चाहतेही तिच्या उत्तम आरोग्यासाठी प्रार्थना करत आहेत.
अभिनवने ट्वीट केल्यानंतर रुबीनाचे चाहते चिंतेत होते. पण आता तिची प्रकृती एकदम ठिक आहे. ‘खतरोंके खिलाडी १२’, ‘झलक दिखला जा १०’, ‘बिग बॉस’ सारख्या शोमध्ये रुबीनाने सहभाग घेतला होता. तसेच हिदी मालिकांमध्ये तिने साकारलेल्या भूमिकाही प्रेक्षकांच्या कायम लक्षात राहणाऱ्या आहेत.
