‘तू-तू मैं-मैं’ ही मालिका छोट्या पडद्यावर आली आणि तुफान लोकप्रिय झाली. ही मालिका संपून अनेक वर्षं होऊन गेली असली तरीही आज प्रेक्षकांच्या मनात घर करून आहे. सासू-सुनेमधील कुरबुरी या मालिकेमध्ये दाखवल्या गेल्या होत्या. तर आता ही मालिका नव्याने प्रेक्षकांच्या भेटीला येणार आहे.
‘तू-तू मैं-मैं’ या मालिकेमध्ये सुप्रिया पिळगावकर सुनेच्या भूमिकेमध्ये होत्या तर अभिनेत्री रीमा लागू यांनी या मालिकेत सासूची भूमिका साकारली होती. ९०च्या दशकांत ही मालिका खूप गाजली. २६ जुलै १९९४ रोजी या मालिकेचा पहिला भाग प्रसारित झाला. पहिल्या भागापासूनच या मालिकेला प्रेक्षकांचं भरभरून प्रेम मिळत गेलं. आता याचा दुसरा भाग लवकरच सुरू होणार आहे.
आणखी वाचा : “त्या काळी आमच्यात स्पर्धा होती पण…,” सचिन पिळगांवकरांनी उलगडलं महेश कोठारेंबरोबरचं नातं
‘तू-तू मैं-मैं’ या मालिकेचं दिग्दर्शन सचिन पिळगावकर यांनी केलं होतं. आता नुकत्याच दिलेल्या एका मुलाखतीमध्ये त्यांनी या मालिकेच्या दुसऱ्या भागाबद्दल मोठा खुलासा केला. ते म्हणाले, “या मालिकेला नव्याने प्रेक्षकांसमोर आणण्याची मी तयारी करत आहे. या मालिकेच्या पहिल्या भागात सुप्रिया सुनेची भूमिका साकारत होती, तर आता या मालिकेच्या दुसऱ्या भागामध्ये ती सासूच्या भूमिकेत दिसेल.”
पुढे ते म्हणाले, “आताची तरुण पिढी या मालिकेचा पहिला भाग प्रसारित झाला तेव्हा शाळेत होती. ही पिढी ही मालिका पाहत लहानाची मोठी झाली आहे. त्या वेळी रीमा लागू यांचं हिंदी मनोरंजनसृष्टीतही मोठं नावं होतं, तर सुप्रिया हिंदी मालिका पाहणाऱ्या प्रेक्षकांसाठी नवी होती. पण मालिका सुरू झाल्यानंतर दोन महिन्यांच्या काळातच प्रेक्षकांनी या दोघींनाही अक्षरशः डोक्यावर घेतलं.” सचिन पिळगावकर यांचं हे बोलणं ऐकून आता ही नवी मालिका कधी सुरू होणार, याकडे प्रेक्षकांचं लक्ष लागलं आहे.
