मराठमोळी अभिनेत्री सई लोकूर ‘बिग बॉस मराठी’च्या पहिल्या पर्वात सहभागी झाली होती. या कार्यक्रमामुळे अभिनेत्री घराघरांत लोकप्रिय झाली. २०२० मध्ये अभिनेत्रीने तीर्थदीप रॉयसह लग्न केलं. लवकरच सईच्या घरी नव्या पाहुण्याचं आगमन होणार आहे. काही दिवसांपूर्वी सोशल मीडियावर पोस्ट शेअर करत अभिनेत्रीने गरोदर असल्याची माहिती तिच्या चाहत्यांना दिली होती.
सई लोकूरने बाळाचं स्वागत करण्यासाठी काही काळासाठी मनोरंजन विश्वातून ब्रेक घेतला आहे. अलीकडे ती सोशल मीडियाच्या माध्यमातून चाहत्यांच्या संपर्कात राहते. तिने नुकताच बेबी बंपसह करीना कपूरचं लोकप्रिय गाणं “अंदेखी अंजानी…”वर डान्स केला.
“माझ्या लहान बाळाला भेटण्यासाठी मी खूपच आतुर आहे”, असं कॅप्शन अभिनेत्रीने या व्हिडीओला दिलं आहे. बिग बॉस विजेती मेघा धाडेने या व्हिडीओवर खास कमेंट करत लाडक्या मैत्रिणीला काळजी घे असं म्हटलं आहे. याशिवाय सईच्या या व्हिडीओवर अनेक नेटकऱ्यांनी प्रतिक्रिया दिल्या आहेत.
एका युजरने सईच्या व्हिडीओवर, “अगं तुला हे शोभत नाही…यापेक्षा आराम कर, अतिउत्साही होऊ नकोस”, अशी कमेंट केली आहे. यावर उत्तर देताना अभिनेत्री म्हणाली, “मला जे योग्य वाटतं ते मी नेहमीच करते. तुम्हाला आवडत नसेल तर बघू नका. माझ्या येणाऱ्या बाळाला मी आनंदी ठेवण्याचा प्रयत्न करतेय. त्यामुळे तुम्हाला काय आवडतं आणि काय नाही? याचा मला काहीच फरक पडत नाही.”
हेही वाचा : ३० वर्षांपूर्वी बॉलीवूड सोडणाऱ्या अभिनेत्रीला करायचंय पुनरागमन; म्हणाली, “मी बिकिनी मॉम…”
दरम्यान, सई लोकूर आणि तीर्थदीप रॉय दोघेही लवकरच त्यांच्या पहिल्या बाळाचं स्वागत करणार आहेत. सईने आतापर्यंत ‘नो एन्ट्री पुढे धोका आहे’, ‘किस किसको प्यार करू’ अशा अनेक चित्रपटांमध्ये काम केलं आहे. ‘बिग बॉस मराठी’च्या पहिल्या पर्वात ती अंतिम फेरीत दाखल झाली होती.
