मराठीतील छोट्या पडद्यावरील लोकप्रिय कार्यक्रमांपैकी एक म्हणजे ‘महाराष्ट्राची हास्यजत्रा’. गेल्या सात वर्षांपासून हा कार्यक्रम प्रेक्षकांना खळखळून हसवण्याचं काम करत आहेत. महाराष्ट्रातच नाही तर जगभरात ‘महाराष्ट्राची हास्यजत्रा’ कार्यक्रमाचा चाहता वर्ग आहे. त्यामुळे सातत्याने या कार्यक्रमाचे अमेरिका, लंडन दौरे होतं असतात.
नुकताच ‘महाराष्ट्राची हास्यजत्रा’ कार्यक्रमाचा लंडन दौरा झाला. या दौऱ्याला देखील प्रेक्षकांचा उदंड प्रतिसाद मिळाला. याचे फोटो, व्हिडीओ कलाकारांनी सोशल मीडियावर शेअर केले होते. ‘महाराष्ट्राची हास्यजत्रा’ कार्यक्रमाने प्रेक्षकांच्या मनात एक अढळ स्थान निर्माण केलं आहे. त्यामुळे आता लंडन दौऱ्यानंतर ‘महाराष्ट्राची हास्यजत्रा’चं नवं पर्व सुरू होतं आहे. आजपासून या नव्या पर्वाला सुरुवात होतं आहे. त्यानिमित्ताने कार्यक्रमातील कलाकारांशी खास संवाद साधला आहे.
नेहमीप्रमाणे या नव्या पर्वात परीक्षणाची जबाबदारी अभिनेत्री सई ताम्हणकर आणि अभिनेता प्रसाद ओकवर आहे. अशातच सईने हास्यजत्रेच्या सेटवरील आवडत्या तीन गोष्टींचा खुलासा केला आहे. ‘सोनी मराठी’ वाहिनीच्या सोशल मीडियावर सईचा व्हिडीओ शेअर करण्यात आला आहे.
या व्हिडीओमध्ये सुरुवातीला सईला विचारलं की, तू नेहमी कॅरी करतेस अशा तीन गोष्टी कोणत्या? सई म्हणाली, “फोन, लिप बाम आणि घराच्या चाव्या.” त्यानंतर सईला विचारलं की, हास्यजत्रेच्या सेटवरील आवडत्या तीन गोष्टी कोणत्या? तर अभिनेत्री म्हणाली, “शेंगदाणे, माझी खुर्ची आणि सगळं.”
दरम्यान, सई ताम्हणकरच्या कामाबद्दल बोलायचं झालं तर, ती ‘अग्नि’ या हिंदी चित्रपटात झळकणार आहे. ६ डिसेंबरला सईचा ‘अग्नि’ चित्रपट अमेझॉन प्राइमवर प्रदर्शित होणार आहे. या चित्रपटात अभिनेता प्रतिक गांधी, दिव्येंदु शर्मा, सैयामी खेर प्रमुख भूमिकेत पाहायला मिळणार आहेत. याशिवाय सई पुष्कर श्रोत्री दिग्दर्शित ‘असंभव’ चित्रपटात दिसणार आहे. १ मे २०२५ रोजी सईचा नवा मराठी चित्रपट प्रेक्षकांच्या भेटीस येणार आहे. तसंच याआधी सई ‘बोल बोल राणी’ या थ्रिलर चित्रपटात सुबोध भावे, चिन्मय मांडलेकर यांच्याबरोबर पाहायला मिळणार आहे. तिचा हा चित्रपट ७ फेब्रुवारी २०२५ रोजी प्रदर्शित होणार आहे.
© IE Online Media Services (P) Ltd