एनसीबी अधिकारी समीर वानखेडे हे नाव गेली दोन वर्षे खूप चर्चेत राहिलं. अभिनेता शाहरुख खानच्या मुलाला ड्रग्ज प्रकरणात अटक करण्यात आली होती. त्या क्रूझवर छापेमारी समीर वानखेडे व त्यांच्या टीमने केली होती. हेच समीर वानखेडे ‘खुपते तिथे गुप्ते’ या शोच्या आगामी एपिसोडमध्ये हजेरी लावणार आहे. यावेळी त्यांनी ड्रग्ज आणि सेलिब्रिटींच्या तपासणीबाबत विचारण्यात आलेल्या प्रश्नांची उत्तरं दिली.
‘खुपते तिथे गुप्ते’ शोमधील काही प्रोमो इन्स्टाग्रामवर प्रदर्शित करण्यात आले आहेत. त्यामध्ये अवधूत गुप्तेने विचारलेल्या काही प्रश्नांची उत्तरं समीर वानखेडेंनी दिली. ‘सेलिब्रिटींना विमानतळावर सर्वात जास्त भीती समीर वानखेडे या नावाची वाटायची. खूप लोक म्हणायचे की वानखेडे मुद्दाम सेलिब्रिटींची जास्त तपासणी करायला लावतात,’ असं अवधूतने विचारलं.
उत्तर देत समीर वानखेडे म्हणाले, “माझ्यासाठी सेलिब्रिटी बाबा आमटे, सिंधुताई सपकाळ आणि एपीजे अब्दुल कलाम आहेत. एअरपोर्टवर असताना जवळपास साडेतीन हजार केसेस होत्या. त्यापैकी तुमच्या भाषेत ज्यांना तुम्ही सेलिब्रिटी वगैरे म्हणता ते किती असतील, फक्त ५०, १००, १५०. बाकीचे लोक कोण आहेत? बाकीचे लोक हे गंभीर गुन्हेगार, ड्रग पेडलर्स असतात. त्यांच्याबद्दल कुणीच काही सांगत नाही.”
अवधूत गुप्तेने समीर वानखेडेंना दुसरा प्रश्न विचारला. ‘ड्रग्जसारख्या गोष्टींना आपल्या देशातील लोक अजुनही गांभीर्याने घेत नाहीत, हे खुपतं का?’ या प्रश्नावर समीर म्हणाले, “आपलं शरीर हे देवासारखं, एका मंदिरासारखं स्वच्छ आहे. ड्रग्जचे सेवन करून तुम्ही फक्त तुमच्या शरीराचंच नुकसान करत नाही तर राष्ट्राचंही नुकसान करता. हेच पैसे तुमच्या देशाच्या विरोधातील कारवाईसाठी, आपल्या आर्मीवर, आपल्या पोलिसांवर हल्ला करण्यासाठी वापरले जातात. मला देशातील तरुणांना हेच सांगायचं आहे की तुम्ही त्यासाठी जे पैसे देता ते आपल्या शत्रूंकडे जातात. त्यामुळे आपण हे थांबवायला हवं.”
दरम्यान, एक चर्चेतले सरकारी अधिकारी ‘खुपते तिथे गुप्ते’ शोच्या पुढील एपिसोडमध्ये दिसणार आहेत. त्यामुळे ते या मुलाखतीत आणखी काय खुलासे करतात, हे पाहणं महत्त्वाचं ठरेल.
