छोट्या पडद्यावरील ‘खुपते तिथे गुप्ते’ या शोचा तिसरा सीझन प्रेक्षकांच्या पसंतीस उतरत आहे. या तिसऱ्या पर्वाच्या नव्या भागात खासदार संजय राऊत हजेरी लावणार आहे. या कार्यक्रमात विचारलेल्या राजकीय तसेच वैयक्तिक आयुष्यातील प्रश्नांवर संजय राऊत त्यांच्या खास शैलीत उत्तरं देणार आहेत.
‘खुपते तिथे गुप्ते’च्या नव्या भागाचे काही प्रोमो व्हिडीओ प्रदर्शित करण्यात आले आहेत. अवधूत गुप्ते या कार्यक्रमाचं सूत्रसंचालन करत असून या व्हिडीओमध्ये तो संजय राऊतांना धारदार प्रश्न विचारताना दिसत आहे. “राज ठाकरेंच्या राजीनाम्याचं पत्र तुम्हीच लिहिलं होतं, असा तुमच्यावर आरोप आहे,” असा प्रश्न संजय राऊतांना विचरला गेला.
या प्रश्नाचं उत्तर देत ते म्हणाले, “त्या काळातील राज ठाकरे व माझी मैत्री ही जगजाहीर होती. आम्ही एकमेकांकडे अनेक भावना व्यक्त करायचो. त्यांच्या मनात काय आहे, हे मला माहीत होतं. याविषयी आम्ही बाळासाहेब ठाकरेंशीही चर्चा केली होती. पण ही कुटुंबात पडलेली फूट आहे. तेव्हा माझ्यावर तुम्ही राज ठाकरेंच्या फार जवळ आहात, असा आरोप व्हायचा. मी पक्षाचा किंवा उद्धव ठाकरेंचा मालक नाही. मी अनेकांच्या जवळ आहे. त्यांच्याबरोबरची नाती मी टिकवून ठेवली, हे अनेकांना खुपतं.”
झी वाहिनीवरील ‘खुपते तिथे गुप्ते’ या कार्यक्रमात मनसे अध्यक्ष राज ठाकरे, केंद्रीय मंत्री नारायण राणे यांनी हजेरी लावली होती. मुख्यमंत्री एकनाथ शिंदेही या कार्यक्रमात सहभागी होणार आहेत.
