सिनेसृष्टीत अनेक कलाकारांची मुलं हे त्यांच्याच पावलावर पाऊल टाकत अभिनय क्षेत्राकडे वळलेली पाहायला मिळतात. तर काही कलाकार मंडळी मात्र याला अपवाद ठरताना पाहायला मिळत आहेत. मराठी चित्रपटसृष्टीत आपल्या उत्तम अभिनय शैलीमुळे प्रेक्षकांची मनं जिंकणारे अभिनेते शरद पोंक्षे. अनेक चित्रपट, नाटक आणि मालिका यांच्या माध्यमातून त्यांनी कायमच प्रेक्षकांचं मनोरंजन केलं आहे. वैविध्यपूर्ण भूमिका साकारणारे शरद पोंक्षे हे सोशल मीडियावर कायमच सक्रीय असतात. आता अभिनेते शरद पोंक्षे यांनी लेकीसाठी खास पोस्ट लिहित तिच्याबद्दलचा अभिमान व्यक्त केला आहे.
शरद पोंक्षे यांची मुलगी सिद्धी वैमानिक होण्याचं शिक्षण घेण्यासाठी परदेशात गेली होती. त्यावेळी त्यांनी सिद्धी परदेशात शिकण्यासाठी जात असताना विमानतळावरचे काही फोटो शेअर करत तिच्यासाठी एक भावूक पोस्ट केली होती. त्यात त्यांनी ‘पिल्लू निघालं वैमानिक व्हायला’ असं लिहिलं होतं. आता तिचं ते स्वप्न पूर्ण झालं आहे.
आणखी वाचा : “पायाजवळ घोणस आली आणि…”; उमा पेंढारकरने सांगितला शूटिंगदरम्यानचा चित्तथरारक अनुभव
नुकतीच ती एका प्रायव्हेट विमानाची पायलट झाली. ही आनंदाची बातमी शरद पोंक्षे यांनी सोशल मीडियावर शेअर केली. सिद्धीचा एक फोटो आणि व्हिडिओ फेसबुकवर शेअर करत शरद पोंक्षे यांनी लिहिलं, “सिद्धी शरद पोंक्षे आज प्रायव्हेट पायलट झाली. असंख्य अडचणीतून मार्ग काढत ती इथपर्यंत पोहोचली. अभिनंदन सिद्धी…”
सिद्धी पोंक्षे ही लहानपणापासूनच शालेय शिक्षणात हुशार होती. बारावीमध्ये असताना तिने विज्ञान शाखेत ८७ टक्के गुण मिळवले होते. त्यावेळीही शरद पोंक्षे यांनी एक पोस्ट शेअर केली होती.
हेही वाचा : “१०६ वर्षांची पेशवाई फक्त…”; शरद पोंक्षेंचं बाजीराव पेशवेंबद्दलचं वक्तव्य चर्चेत
त्यावेळी लेकीच्या कौतुकात त्यांनी म्हटलं होतं की, ‘२०१९ साली माझे कर्करोगावरील उपचार चालू होते. रुग्णालयामध्ये येऊन कॉलेजचा अभ्यास करून एवढ्या टेंशनमध्ये असतानाही पिल्लूनं ८७ टक्के मार्क १२ विज्ञान शाखेत मिळवले. अभिमान वाटला मला आणि सतत वाईट बातम्या चहूबाजूनी येत असताना एवढी चांगली बातमी सांगायला आनंद होतोय’, असं त्यांनी या पोस्टमध्ये लिहिलं होतं. आता शरद पोंक्षे यांच्या पोस्टमधून सिद्धी वैमानिक झाल्याचे कळतात तिच्यावर सर्वजण अभिनंदनाचा वर्षाव करत आहेत.
