अभिनेत्री तुनिषा शर्माने २४ डिसेंबरला शूटिंग सुरू असतानाच सेटवर गळफास लावून आत्महत्या केली. तुनिषाच्या अचानक जाण्याने तिच्या कुटुंबियांना धक्का बसला आहे. तुनिषाने वयाच्या १४व्या वर्षी वडिलांना गमावलं होतं. तुनिषाच्या आत्महत्येप्रकरणी तिची आई वनिता शर्मा यांनी तिचा सहकलाकार शिझान खानवर आरोप केले होते. शिझानने ब्रेक-अप केल्याने ती नैराश्यात होती, असंही त्या म्हणाल्या होत्या.
वनिता शर्मांच्या तक्रारीनंतर शिझान खानला अटक करण्यात आली, त्याला कोर्टासमोर हजर करण्यात आलं व कोर्टाने त्याला चार दिवसांची पोलीस कोठडी सुनावली आहे. पोलीस तुनिषाच्या मृत्यूप्रकरणी शिझानची कसून चौकशी करत आहेत. शिझानच्या कुटुंबीयांनी तुनिषाच्या कुटुंबाचे आरोप फेटाळले असून तो निर्दोष असल्याचं म्हटलंय. आता पुन्हा वनिता शर्मा यांनी शिझानविरोधात संताप व्यक्त केला आहे. “शिझान आधी तुनिषाबरोबर नात्यात आला, त्याने लग्नाचे आश्वासन दिले आणि नंतर तिचा विश्वासघात केला. शिझानने माझ्या मुलीचा ३-४ महिने वापर केला”, असा आरोप तुनिषाच्या आईने केला आहे.
“शिझानने तुनिषाची फसवणूक केली होती, तुनिषाबरोबर असताना त्याने दुसऱ्या मुलीशी संबंध ठेवले होते, त्याने माझ्या मुलीची फसवणूक केली होती. त्यामुळे शिझानला सोडू नये, त्याला शिक्षा झालीच पाहिजे”, असा आक्रोश वनिता शर्मा यांनी केला आहे.
दरम्यान, तुनिषाच्या मृतदेहाचं शवविच्छेदन करण्यात आलंय. त्यात तिला मृत्यू जीव गुदमरल्यामुळे झाल्याचं डॉक्टरांनी सांगितलं. जेव्हा तुनिषाने गळफास घेतला, तेव्हा शिझान शूटिंग करत होता, अशीही बाब समोर आली आहे. शिझानने आपल्यावरील आरोप नाकारल्याचं कळतंय.
