Bigg Boss 18 : सलमान खानचा बहुचर्चित शो ‘बिग बॉस’चं १८वं पर्व ६ ऑक्टोबरपासून प्रेक्षकांच्या भेटीस येत आहे. अवघ्या दोन दिवसांवर ‘बिग बॉस’च्या १८व्या पर्वाचा ग्रँड प्रिमियर येऊन ठेपला आहे. त्यामुळे सध्या या पर्वाची जोरदार चर्चा सुरू आहे. या पर्वात कोणते कलाकार स्पर्धक म्हणून सहभागी होणार आणि कोणत्या कलाकारांनी सलमानचा हा बहुचर्चित शो नाकारला याची चर्चा रंगली आहे. अशातच ‘कलर्स टीव्ही’ने ‘बिग बॉस’च्या १८व्या पर्वात सहभागी होणाऱ्या काही सदस्यांचे प्रोमो शेअर केले आहेत.
‘कलर्स टीव्ही’ने सोशल मीडियावर सर्वात आधी अभिनेत्री शिल्पा शिरोडकर यांचा प्रोमो शेअर केला आहे. ९०चं दशक आपल्या बोल्ड आणि घायाळ अदांनी गाजवणाऱ्या या मराठी चेहऱ्याची ‘बिग बॉस’च्या १८व्या पर्वात एन्ट्री होणार असल्याचं निश्चित झालं आहे. शिल्पा शिरोडकर यांचा दमदार प्रोमो सध्या व्हायरल झाला आहे. त्यांचं सलमान खानबरोबर काम करण्याचं स्वप्न होतं; जे आता ‘बिग बॉस १८’च्या माध्यमातून पूर्ण होतं असल्याचं शिल्पा शिरोडकर यांनी सांगितलं आहे.
शिल्पा शिरोडकर यांचं खास नातं दाक्षिणात्य सुपरस्टार महेश बाबूशी आहे. महेश बाबूच्या त्या मेव्हूणी आहेत. शिल्पा शिरोडकर यांची सख्खी बहीण नम्रता शिरोडकर महेश बाबूची पत्नी आहे.
शिल्पा शिरोडकर यांच्यानंतर ‘बिग बॉस’च्या १८व्या पर्वातील दुसऱ्या स्पर्धकाचा जबरदस्त प्रोमो प्रदर्शित झाला आहे. हा स्पर्धक मूळचा पंजाबचा असून त्याने जवळपास चार मालिका केल्या आहेत. पण एकेदिवशी निर्मात्याने या अभिनेत्याला सर्वांसमोर अपमानित करून सेटवरून थेट बाहेरचा रस्ता दाखवला. आता हाच अभिनेता ‘बिग बॉस’च्या १८व्या पर्वात सहभागी होत आहे. या अभिनेत्याचा प्रोमो पाहून ‘ये रिश्ता क्या कहलाता है’ या लोकप्रिय मालिकेतील शेहजादा धामी असल्याचा नेटकऱ्यांनी अंदाज लावला आहे.
याशिवाय ‘बिग बॉस १८’च्या आणखी एका स्पर्धकाचा जबरदस्त प्रोमो समोर आला आहे. या प्रोमोमधील अभिनेत्री ‘नाथ कृष्ण और गौरी की कहानी’ मालिकेतील चाहत पांडे असल्याचं नेटकरी म्हणत आहेत.
‘बिग बॉस १८’ची थीम
यंदाच्या ‘बिग बॉस’च्या पर्वात बरंच वेगळं काहीतरी पाहायला मिळणार आहे. भूतकाळ, वर्तमानकाळ आणि भविष्यकाळ यावर आधारित ‘बिग बॉस’च्या १८व्या पर्वाची थीम आहे. त्यामुळे नेमकं शोमध्ये काय असणार आहे? याची उत्सुकता प्रेक्षकांना लागली आहे.
