मराठमोळे दिग्दर्शक महेश मांजरेकर यांचा मुलगा व अभिनेता सत्या मांजेरकरने नवीन व्यवसाय सुरू केला आहे. काही दिवसांपूर्वी त्याने स्वतःचं हॉटेल सुरू केलं आहे. त्याच्या हॉटेलची सध्या चांगलीच चर्चा आहे. सत्याने त्याच्या हॉटेलचं नाव ‘सुका सुखी’ असं ठेवलं आहे. चार दिवसांपूर्वी अभिनेत्री नीना कुळकर्णी यांनी सत्या मांजरेकरच्या हॉटेलमधून चमचमीत जेवण ऑर्डर केलं होतं. त्यानंतर आता शिव ठाकरेनेही त्याच्या हॉटेललं भेट दिली आहे.
शिव ठाकरे लवकरच ‘खतरों के खिलाडी’ या रिअॅलिटी शोमध्ये दिसणार आहे. त्यापूर्वी त्याने मुंबईत सिद्धीविनायकाचे दर्शन घेतले. बाप्पांच्या चरणी पोहोचून शिवने आशीर्वाद घेतले, नंतर त्याने सत्या मांजरेकरच्या नव्या हॉटेलला भेट दिली. शिवने इन्स्टाग्रामवर सत्या मांजरेकरबरोबर त्याच्या हॉटेलबाहेरचा फोटो शेअर केला आहे. ‘नवीन सुरुवातीसाठी शुभेच्छा, सत्या मांजरेकर,’ असं कॅप्शन शिवने या फोटोला दिलंय.
दरम्यान, महेश मांजरेकरांचा मुलगा सत्या मांजरेकरने काही दिवसांपूर्वी मुंबई उपनगरातील गोरेगाव परिसरात स्वत:चे हॉटेल सुरु केले आहे. ‘सुका सुखी’ (Suka Sukhi) असं सत्याच्या हॉटेलचं नाव आहे. अनेक मराठी कलाकार सत्याच्या हॉटेलमधून जेवण मागवून त्याचा आस्वाद घेताना दिसत आहेत.
