Shivani Sonar & Ambar Ganpule Wedding Updates : मराठी कलाविश्वात गेल्या काही दिवसांपासून शिवानी सोनार आणि अंबर गणपुळे यांची लगीनघाई सुरू असल्याचं पाहायला मिळत आहे. काही दिवसांपूर्वीच ‘रंग माझा वेगळा’ मालिकेच्या टीमने या दोघांचं केळवण केलं होतं. यानंतर या दोघांच्या घरी आता लग्नाआधीच्या विधींना सुरूवात झालेली आहे.
शिवानी ( Shivani Sonar ) आणि अंबर हे दोघंही मराठी मालिका विश्वातील लोकप्रिय कलाकार म्हणून ओळखले जातात. आजवर दोघांनीही अनेक गाजलेल्या मालिकांमध्ये प्रमुख भूमिका साकारल्या आहेत. या दोघांनी गेल्यावर्षी गुढीपाडव्याच्या मुहूर्तावर साखरपुडा करत चाहत्यांना सुखद धक्का दिला होता. यानंतर चाहते या दोघांच्या लग्नसोहळ्याची आतुरतेने वाट पाहत होते. आता येत्या दोन दिवसांत ही जोडी विवाहबंधनात अडकणार आहे.
शिवानी व अंबर यांची लग्नपत्रिका
ग्रहमख विधी झाल्यावर या दोघांचा मेहंदी सोहळा नुकताच पार पडला आहे. मेहंदी सोहळ्यात या दोघांनी Twinning केल्याचं पाहायला मिळालं. अंबर आणि शिवानी या दोघांनी मेहंदी सोहळ्यातील सुंदर क्षण सोशल मीडियावर शेअर केले आहेत. याशिवाय या दोघांच्या लग्नपत्रिकेची पहिली झलक सुद्धा इन्स्टाग्राम स्टोरीवर शेअर करण्यात आली आहे.
अंबर आणि शिवानी येत्या २१ जानेवारीला विवाहबंधनात अडकणार आहेत. अभिनेत्रीने तिच्या लग्नपत्रिकेची पहिली झलक इन्स्टाग्रामवर शेअर केलेली आहे. यावर शिवानी आणि अंबर या दोघांच्या नावाची फोड करून ‘#Ambani’ हा हॅशटॅग सुद्धा वापरण्यात आला आहे.
दरम्यान, अंबर-शिवानीच्या कामाबद्दल सांगायचं झालं, तर अंबरने आतापर्यंत ‘रंग माझा वेगळा’ (Rang Maza Vegla ), ‘कलर्स मराठी’ची मालिका ‘दुर्वा’ यामध्ये महत्त्वाच्या भूमिका साकारल्या आहेत. तर, शिवानी ‘राजा राणीची गं जोडी’ आणि ‘तू भेटशी नव्याने’ अशा मालिकांमध्ये झळकली आहे. आता लवकरच शिवानी आणि अंबर यांचा विवाहसोहळा पार पडणार आहे.
© IE Online Media Services (P) Ltd