राजा राणीची गं जोडी! शिवानी सोनार व अंबर गणपुळे अडकले विवाहबंधनात, लग्नातील पहिला फोटो आला समोर

शिवानी व अंबर यांनी लग्नात पारंपरिक लूक केल्याचं फोटोंमध्ये पाहायला मिळत आहे. अभिनेत्रीने हिरव्या रंगाची सुंदर अशी नऊवारी साडी, त्यावर लाल रंगाचा शेला, हातात हिरवा चुडा, भरजरी दागिने, नाकात नथ असा पारंपरिक लूक लग्नात केला होता. तर, अंबरच्या मराठमोळ्या लूकने सुद्धा सर्वांचं लक्ष वेधून घेतलं आहे. या दोघांच्या लग्नातील अनेक इनसाइड व्हिडीओ आणि फोटो सध्या सोशल मीडियावर व्हायरल होत आहेत.

शिवानी आणि अंबर यांचा साखरपुडा गेल्यावर्षी गुढीपाडव्याच्या शुभमुहूर्तावर पार पडला होता. यानंतर शिवानी आणि अंबरसाठी ‘रंग माझा वेगळा’ मालिकेच्या टीमने खास केळवण आयोजित केलं होतं. याशिवाय संगीत सोहळ्यात सुद्धा या जोडप्याने दाक्षिणात्य गाण्यावर तुफान एनर्जीसह डान्स केल्याचा व्हिडीओ सर्वत्र चर्चेत आला होता. लग्नाआधीचे सगळे विधी पार पडल्यावर आता ही जोडी विवाहबंधनात अडकली आहे.

दरम्यान, शिवानी आणि अंबर यांच्या कामाबद्दल सांगायचं झालं, तर ‘राजा राणीची गं जोडी’ या मालिकेमुळे शिवानीला घराघरांत लोकप्रियता मिळाली. यामध्ये तिने संजीवनी बांदल- ढालेपाटील हे पात्र साकारलं होतं. यानंतर अभिनेत्री सुबोध भावेबरोबर ‘तू भेटशी नव्याने’ या मालिकेत प्रमुख भूमिकेत झळकली होती.

तर, अभिनेता अंबर गणपुळे ‘रंग माझा वेगळा’ मालिकेमुळे प्रसिद्धीझोतात आला. याशिवाय त्याने ‘कलर्स मराठी’ वाहिनीच्या ‘दुर्वा’ मालिकेत प्रमुख भूमिका साकारली होती. काही दिवसांपूर्वीच या मालिकेने प्रेक्षकांचा निरोप घेतला.