“दारूच्या व्यसनाने त्याला संपवलं,” एक्स पतीच्या निधनाबद्दल मराठमोळ्या अभिनेत्रीचं वक्तव्य; अडीच महिन्यांपूर्वी झाला घटस्फोट

पियुष रुग्णालयात दाखल असताना शुभांगी त्याच्या संपर्कात होती. शुभांगी इ-टाइम्सशी बोलताना म्हणाली, “मी १६ एप्रिल रोजी त्याच्याशी बोलले, आणि तो बरा व्हावा अशी प्रार्थना केली. मी भावुक आणि सुन्न झाले आहे. मला सर्व चांगल्या गोष्टींसाठी पियुषला आठवणीत ठेवायचं आहे. मी लवकरच त्याच्या कुटुंबाबरोबर इंदूरला जाणार आहे. आमची मुलगी आशी अमेरिकेत शिकतेय, तिच्या परीक्षा संपल्यावर आम्ही एकत्र जाऊ.”

त्याच्या व्यसनाने त्याला संपवलं – शुभांगी अत्रे

पियुष निधनानंतर नेटकरी शुभांगीवर टीका करत आहेत. याबद्दल ती म्हणाली, “पूर्ण गोष्ट माहीत नसतानाही लोकांबद्दल मतं तयार करून बोलणं सोपं आहे. मी यशस्वी झाल्याने त्याला सोडलं असं लोकांना वाटतं; पण ते अजिबात खरं नाही. बरीच वर्षे या नात्यात झालेल्या घुसमटीनंतर मी वेगळं व्हायचं ठरवलं. मी त्याला सोडलं कारण त्याच्या दारूच्या व्यसनाने आमच्या आयुष्यावर परिणाम केला. मी माझं लग्न वाचवण्याचा सर्वतोपरी प्रयत्न केला. आमच्या दोन्ही कुटुंबांनी त्याला मदत करण्याचा प्रयत्न केला, पण त्याच्या व्यसनाने त्याला संपवलं.”

एका रात्रीत घटस्फोट घेतला नव्हता – शुभांगी

शुभांगी अत्रे पुढे म्हणाली, “मला माझी मुलगी आशीचाही विचार करायचा होता. तिचं चांगलं व्हावं म्हणून विभक्त व्हायचा कठीण निर्णय घेतला. हा एका रात्रीत घेतलेला निर्णय नव्हता. २०१८-१९ मध्ये आमच्यातील गोष्टी बिघडल्या आणि शेवटी २०२५ मध्ये घटस्फोट झाला. आमच्या घटस्फोटानंतरही, मी त्याच्या संपर्कात होते. त्याची मदत करण्याचा प्रयत्न केला, त्याच्या कुटुंबाच्याही संपर्कात होते.”

व्यसनाचे किती गंभीर परिणाम होतात, ते समजून घेण्याचं आवाहन शुभांगीने लोकांना केलं. “हे व्यसन फक्त एका व्यक्तीला संपवत नाही, तर त्याचे परिणाम त्या व्यक्तीभोवती असेल्या इतरांवरही होतात. खासकरून लहान मुलं. अनेकदा हा त्रास काहीच न बोलता सहन करावा लागतो. मला वाटतं की माझ्या मुलीने माझ्यापेक्षा जास्त त्रास सहन केला आहे,” असं शुभांगी म्हणाली.

‘भाबीजी घर पर है’ फेम अभिनेत्री म्हणाली की व्यसन त्रासदायक आहे. एकदा व्यसन जडलं की ते सोडवणं खूप कठीण आहे.