Siddharth Jadhav Wife Trupti New Business : नवीन वर्षात काहीतरी वेगळं, हटके करायचं असं स्वप्न प्रत्येकाचं असतं. अशाच अनेक आशा-आकांशा घेऊन संपूर्ण जगभरात २०२५ या नवीन वर्षांचं स्वागत करण्यात आलं. सामान्य लोकांप्रमाणे सेलिब्रिटींनी सुद्धा आपल्या कुटुंबांसह वेळ घालवत या नव्या वर्षाची सुरुवात केली. तर, काही कलाकारांनी वर्षाच्या पहिल्याच दिवशी आपल्या चाहत्यांना आनंदाच्या बातम्या दिल्या आहेत. मराठी कलाविश्वातील लोकप्रिय अभिनेता सिद्धार्थ जाधवने देखील आपल्या तमाम चाहत्यांबरोबर नुकतीच एक गुडन्यूज शेअर केली आहे. अभिनेत्याच्या पत्नीने या नवीन वर्षात स्वत:चा नवा व्यवसाय सुरू केला आहे.
२०२४ च्या डिसेंबर महिन्यात सिद्धार्थची पत्नी तृप्तीने सोशल मीडियावर ‘Something New Coming’ अशी पोस्ट शेअर करत चाहत्यांना नव्या बिझनेसची हिंट दिली होती. आता तृप्तीने तिच्या नव्या व्यवसायाची पहिली झलक सर्वांना दाखवली आहे.
सिद्धार्थ जाधवची खास पोस्ट
तृप्ती ही बिझनेसवुमन म्हणून ओळखली जाते. काही वर्षांपूर्वी तृप्तीने ‘स्वइरा’ हा तिचा कपड्यांचा ब्रँड लॉन्च केला होता. यानंतर आता तृप्तीने आणखी एका क्षेत्रात पाऊल ठेवलं आहे. अलिबागमध्ये तिने सुंदर असा होमस्टे सुरू केला आहे. ‘तृप्ती कॉटेज’ असं तिच्या नव्या व्यवसायचं नाव आहे. अलिबागला जाणारे पर्यटक या होमस्टेमध्ये राहू शकतात. तृप्तीने हा ३ बीएचके व्हिला अतिशय सुंदर पद्धतीने डिझाइन केला आहे.
सिद्धार्थ पत्नीचं कौतुक करत लिहितो, “अभिनंदन तृप्ती… आज तुझं स्वप्न पूर्ण झालं आहे. तुझं स्वप्न सत्यात उतरलं यासाठी मी खूप आनंदी आहे. गॉड ब्लेस यू” अभिनेत्याने या पोस्टवर ‘तृप्ती कॉटेज’ आणि ‘पिवळा बंगला’ असे हॅशटॅग्ज वापरले आहेत.
हेही वाचा : ‘तारक मेहता..’ फेम ‘सोनू भिडे’ अडकली लग्नबंधनात, बाबाची भूमिका करणारा मंदार चांदवडकर माफी मागत म्हणाला…
दरम्यान, सिद्धार्थ जाधवच्या कामाबद्दल सांगायचं झालं, तर सध्या तो ‘स्टार प्रवाह’च्या आता ‘होऊ दे धिंगाणा’ या शोच्या तिसऱ्या पर्वाचं होस्टिंग करत आहे. या शोला प्रेक्षकांची सुद्धा भरभरून पसंती मिळत आहे.
