प्रथमेश लघाटे हा आजच्या तरुण पिढीतील आघाडीच्या गायकांपैकी एक आहे. ‘सा रे ग म प लिटिल चॅम्प्स’पासून प्रेक्षक त्याला बघत आले आहेत. त्याच्या गायनाचं नेहमीच भरभरून कौतुक होत असतं. तर आता सध्या तो त्याच्या वैयक्तिक आयुष्यामुळे चांगलाच चर्चेत आहे. प्रथमेश खूप खवय्या आहे. पण तितकीच तो त्याच्या आहाराची काळजी घेतो. काही वर्षांपूर्वी तो ‘सा रे ग म प’मध्ये असताना त्याला सगळे ‘मोदक’ असं म्हणत होते. पण गेल्या काही महिन्यांमध्ये त्याने १४ किलो वजन कमी केलं आहे. ते कसं केलं हे आता त्याने सांगितलं आहे.
काही दिवसांपूर्वी मुग्धा वैशंपायन आणि प्रथमेश लघाटे यांनी त्यांचा एक फोटो शेअर करत ते दोघे एकमेकांना डेट करत असल्याचं जाहीर केलं. त्यानंतर सर्वत्र त्यांच्यावर अभिनंदनचा वर्षाव होत आहे. त्यामुळे सध्या ते अनेक मुलाखती एकत्र देत त्यांच्या आयुष्याबद्दल भरभरून बोलत आहेत. आता ‘राजश्री मराठी’ला दिलेल्या मुलाखतीमध्ये त्याने वजन कमी करण्यासाठी काय काय केलं हे सांगितलं.
तो म्हणाला, “मी डाएट १००% पाळतो आणि माझं डाएट आयुर्वेदिक पद्धतीचं आहे. आयुर्वेदामध्ये दिनचर्या आणि ऋतुचर्या अशा दोन व्याख्या आहेत. त्यानुसार मी माझ्या आहारात बदल करतो. मी मैदा खाणं बंद केलं आहे आणि रात्री उशिरा जेवणंही मी बंद केलं आहे. कधी कधी आमच्या गाण्याच्या कार्यक्रमांमुळे आम्हाला रात्री उशीर होतो आणि गायल्यामुळे चांगलीच भूक लागते. अशावेळी मी उपमा किंवा खिचडी असं हलकं काहीतरी खातो.”
पुढे व्यायामाबद्दल बोलताना तो म्हणाला, “मी कधीच कुठेही जिम वगैरे लावलेली नाही. मी पारंपारिक पद्धतीने व्यायाम करतो आणि तो मी रोज करतो. सूर्यनमस्कार, दोरी उड्या, चालणं आणि प्राणायाम हा व्यायाम मी करतो. माझा एक भाऊ एमडी आयुर्वेद आहे त्याने मला हे सगळं प्लॅन करून दिलं आहे. तर माझ्यासारखंच डाएट मुग्धाही फॉलो करते.” डाएट आणि व्यायामाच्या बाबतीत प्रथमेशने मुग्धाला बरीच प्रेरणा दिली आहे असा खुलासा मुग्धाने केला. त्यामुळे प्रथमेशची ही फिटनेस जर्नी अनेकांसाठी नक्कीच प्रेरणादायी आहे.
