Spruha Joshi Sukh Kalale Serial Off Air : छोट्या पडद्यावरील वाहिन्यांमध्ये सध्या टीआरपीसाठी मोठी चढाओढ असल्याचं पाहायला मिळत आहे. दमदार कथानक, नव्या कलाकारांची एन्ट्री, रंजक वळण या सगळ्या गोष्टी प्रेक्षकांना नेहमीच आकर्षित करतात. आता येत्या काळात विविध वाहिन्यांवर नवनवीन मालिका सुरू होणार आहेत. या सगळ्या नव्या मालिकांबद्दल प्रेक्षकांच्या मनात उत्सुकता निर्माण झाली आहे. मात्र, काही जुन्या मालिका आता प्रेक्षकांचा निरोप घेणार आहेत.
अभिनेत्री स्पृहा जोशीची ( Spruha Joshi ) प्रमुख भूमिका असलेली ‘सुख कळले’ मालिका २२ एप्रिलपासून प्रेक्षकांच्या भेटीला आली होती. ही मालिका कलर्स मराठीवर प्रसारित करण्यात येते. मात्र, आता लवकरच ही मालिका प्रेक्षकांचा निरोप घेणार असल्याचं समोर आलं आहे. स्पृहा जोशीने सेटवरचे व्हिडीओ, फोटो व पोस्ट शेअर करत याबद्दल माहिती दिली आहे. अभिनेत्रीच्या कॅप्शनवरून मालिका लवकरच प्रेक्षकांचा निरोप घेणार असल्याचं स्पष्ट होत आहे. ही मालिका सुरू होऊन आता जवळपास फक्त ५ महिने पूर्ण होतील.
स्पृहाने शेअर केली खास पोस्ट
स्पृहा लिहिते, “काही प्रवास लहान असतात…पण, निरोप घेणं तेवढंच कठीण जातं. तुम्हा सर्वांबरोबर काम करून खूपच मजा आली…सर्वांबरोबर छान वेळ घालवला. सर्वांचे धन्यवाद आणि दिलेल्या संधीबद्दल मी कायम कृतज्ञ असेन”
दरम्यान, ‘सुख कळले’ या मालिकेत अभिनेत्री स्पृहा जोशी ( Spruha Joshi ) व सागर देशमुख यांच्या प्रमुख भूमिका आहेत. यामध्ये कालांतराने आशय कुलकर्णीने एन्ट्री घेतली. महाराष्ट्राचे लाडके भावोजी आदेश बांदेकर व अभिनेत्री सुचित्रा बांदेकर यांचा लेक सोहमच्या ‘सोहम प्रोडक्शन हाऊस’ची ही मालिका होती. आता या मालिकेचा शेवटचा भाग केव्हा प्रसारित होणार हे लवकरच स्पष्ट होणार आहे. याशिवाय स्पृहाबद्दल सांगायचं झालं, तर ‘उंच माझा झोका’, ‘अग्निहोत्र’, ‘एका लग्नाची दुसरी गोष्ट’ या मालिकांमुळे स्पृहा जोशी घराघरांत लोकप्रिय झाली. चित्रपट, नाटक, मालिका, वेब सीरिज अशा चारही माध्यमांमध्ये तिने आपल्या अभिनयाचा ठसा उमटवला आहे. अभिनयाप्रमाणेच स्पृहा तिच्या कवितांमुळे देखील चर्चेत असते.
© IE Online Media Services (P) Ltd