‘द कपिल शर्मा’ शोच्या माध्यमातून अभिनेत्री सुमोना चक्रवर्ती घराघरांत लोकप्रिय झाली. सुमोना या शोमध्ये कपिल शर्माच्या ऑनस्क्रीन पत्नीचे पात्र साकारते. शोमध्ये एकदा कपिलने अभिनेत्रीच्या चेहऱ्याची आणि ओठांची खिल्ली उडवली होती. यामुळे शोमध्ये काम करताना सुरुवातीच्या काही दिवसात प्रचंड त्रास झाल्याचे सुमोनाने नुकत्याच दिलेल्या एका मुलाखतीत सांगितले.
सुमोना चक्रवर्ती ‘द हॅबिट कोच’ला दिलेल्या मुलाखतीत म्हणाली, “‘द कपिल शर्मा’ मध्ये काम करताना सुरुवातीला मला प्रचंड त्रास झाला. कारण, पहिल्याच एपिसोडमध्ये माझ्या चेहऱ्याची चेष्टा करण्यात आली होती. त्यावेळी फारसे कोणी हसले नाही पण, त्यानंतरच्या भागात प्रेक्षक प्रतिसाद देऊ लागले. तेव्हा मी प्रचंड नाराज झाले.”
हेही वाचा : “ताई, साडीतच राहा…”, प्रसिद्ध मराठमोळ्या अभिनेत्रीचा बोल्ड अंदाज पाहून चाहते नाराज
सुमोना पुढे म्हणाली, “मला वाईट वाटल्याने मी अर्चनाला या सगळ्या गोष्टी सांगितल्या. माझ्या चेहऱ्याची, ओठांची चेष्ठा केल्यामुळे मी अनेकदा एपिसोड सुरु असताना माझे स्क्रिप्ट विसरायचे. मी स्टॅंडअप कॉमेडियन नसल्याने अशाप्रकारे खिल्ली उडवणे मला सहन झाले नाही. त्यानंतर अर्चनाने मला खूप समजावले त्या म्हणाल्या, ‘तुझ्यासारखे ओठ हवेत म्हणून अनेक महिला प्रचंड पैसे खर्च करतात’ त्यांच्यामुळे मला धीर आला.”
हेही वाचा : ओटीटीवरील आक्षेपार्ह आणि अश्लील कंटेटवर निर्बंध येणार? मंत्री अनुराग ठाकूर यांनी घेतली महत्त्वाची बैठक
“शोमध्ये झालेल्या चेष्ठेनंतर मी रेड लिपस्टिक लावायला घाबरायचे. महिलांवर कमेंट्स केल्या जातात, खिल्ली उडवली जाते अशा शोमध्ये तू काम करतेस असे प्रश्न अनेकांनी विचारले. पण, हळूहळू परिस्थिती बदलली. बॅकस्टेजला कपिल आणि माझे नाते वेगळे आहे याची जाणीव झाली. स्क्रिप्टचा भाग म्हणून या गोष्टी कराव्या लागतात. पुढे अर्चनाने समजूत काढल्यावर मी पुन्हा रेड लिपस्टिक लावायला सुरुवात केली”, असे सुमोनाने सांगितले.
