छोट्या पडद्यावरील लोकप्रिय असलेल्या कार्यक्रमांपैकी एक म्हणजे अवधूत गुप्तेचा ‘खुपते तिथे गुप्ते.’ काही दिवसांपूर्वीच या कार्यक्रमाचं तिसरं पर्व प्रेक्षकांच्या भेटीला आलं. या पर्वाला चांगला प्रतिसाद मिळत आहे. तर, आता नुकताच या पर्वाच्या आगामी भागाचा एक प्रोमो समोर आला आहे.
या कार्यक्रमामध्ये आतापर्यंत राज ठाकरे, नारायण राणे, संजय राऊत, देवेंद्र फडणवीस, नितीन गडकरी, श्रेयस तळपदे, अमृता खानविलकर, सई ताम्हणकर, सुबोध भावे अशा अनेक दिग्गजांनी हजेरी लावली आहे. तर, आगामी भागामध्ये राष्ट्रवादी काँग्रेसच्या खासदार सुप्रिया सुळे पाहुण्या म्हणून उपस्थित राहणार आहेत. यावेळी त्या राजकारण आणि त्यांच्या वैयक्तिक आयुष्याबद्दल दिलखुलासपणे संवाद साधताना दिसतील. तसेच उपमुख्यमंत्री म्हणून कोण जास्त प्रभावी आहे, याचं उत्तर त्यांनी या भागात दिलं आहे.
‘खुपते तिथे गुप्ते’ या पर्वाच्या आगामी भागाचा एक प्रोमो नुकताच सोशल मीडियावर आला आहे. त्यामध्ये सुप्रिया सुळे यांना अवधूत गुप्ते काही प्रश्न विचारताना दिसत आहे. त्यादरम्यान अवधूतने सुप्रिया सुळे यांना विचारलं, “उपमुख्यमंत्री म्हणून कोण जास्त प्रभावी आहे? अजित पवार की देवेंद्र फडणवीस?” तर त्यावर उत्तर देत सुप्रिया सुळे म्हणाल्या, “अर्थात, अजित पवार.” त्यांनी दिलेल्या या उत्तरानं सर्वांचं लक्ष वेधलं आहे.
दरम्यान, या प्रोमोनं या आगामी भागाबद्दलची प्रेक्षकांच्या मनातली उत्सुकता आणखीनच वाढवली आहे. ‘खुपते तिथे गुप्ते’चा हा नवीन भाग प्रेक्षकांना येत्या रविवारी पाहायला मिळेल.
