Suraj Chavan And Ajit Pawar Viral Video : ‘बिग बॉस मराठी’च्या पाचव्या पर्वाच्या विजेतेपदावर यंदाच्या वर्षी सूरज चव्हाणने आपलं नाव कोरलं. त्याचा चाहतावर्ग मोठ्या प्रमाणात आहे. आधी टिकटॉक आणि आता सध्या इन्स्टाग्रामवरील रील्समुळे हा ‘गुलीगत किंग’ घराघरांत लोकप्रिय झाला. याच कारणामुळे ‘बिग बॉस’ची टीम त्याच्यापर्यंत पोहोचली आणि त्याला शोबद्दल विचारणा करण्यात आली. आयुष्यात अनेकदा फसवणूक सहन करावी लागल्याने सुरुवातीला सूरजने या शोसाठी नकार कळवला होता. मात्र, त्याला विश्वासात घेऊन ‘बिग बॉस’च्या टीमने त्याची मनधरणी केली. परिणामी, ७० दिवसांचा हा टप्पा पार करून सूरजने विजेतेपदावर आपलं नाव कोरलं.
सूरज चव्हाण ( Suraj Chavan ) मूळचा बारामतीचा आहे. ‘बिग बॉस’च्या घरात पहिल्या दिवसापासून “ट्रॉफी मीच घेऊन जाणार” असं सूरज म्हणत राहायचा. अखेर त्याने त्याचा प्रत्येक शब्द खरा करून दाखवला आहे. सूरजच्या विजयानंतर राज्याचे उपमुख्यमंत्री अजित पवार यांनी पोस्ट शेअर करत त्याचं कौतुक केलं होतं. यानंतर दोन दिवसांपूर्वी त्यांनी स्वत: फोन करून त्याची भेट घेतली. या भेटीदरम्यानचे फोटो आणि व्हिडीओ सध्या सोशल मीडियावर तुफान व्हायरल होत आहेत.
Bigg Boss विजेत्या सूरज चव्हाणची डायलॉगबाजी
सूरज ( Suraj Chavan ) ‘बिग बॉस’ची ट्रॉफी घेऊन अजित पवार यांच्या भेटीला गेला होता. यावेळी उपमुख्यमंत्र्यांनी त्याची विचारपूस केली. घरात कोण-कोण असतं? कमाईचं साधन, बिग बॉसची ऑफर या सगळ्या गोष्टी त्यांनी सूरजला विचारल्या. उपमुख्यमंत्र्यांच्या हस्ते सत्कार होत असताना सूरजने मोठ्या उत्साहात त्याची डायलॉगबाजी सुरू केली.
‘बिग बॉस’च्या घरात सूरज ( Suraj Chavan ) सतत “झापुक झुपूक बच्चा…”, “गुलीगत किंग”, “बुक्कीत टेंगूळ” अशी डायलॉगबाजी करायचा. अजित पवारांसमोर देखील त्याने हे सगळे डायलॉग म्हणून दाखवले. सूरजची ही डायलॉगबाजी ऐकून त्यांना हसू अनावर झालं होतं. यानंतर उपमुख्यमंत्र्यांनी सूरजचं कौतुक करत त्याला काही मोलाचे सल्ले दिले.
हेही वाचा : Video : बाबा सिद्दीकींच्या पार्थिवाचं अंत्यदर्शन घेण्यासाठी सलमान खान पोहोचला; भाईजानचा ‘तो’ व्हिडीओ पाहून चाहते म्हणाले…
दरम्यान, सूरजचं घर अतिशय लहान आहे. त्यामुळे त्याला गावात घर बांधून द्या अशा सूचना अजित पवार यांनी दिल्या आहेत. त्यामुळे सूरजने देखील त्यांचे आभार मानले.
© IE Online Media Services (P) Ltd