छोट्या पडद्यावरील ‘तू तेव्हा तशी’ मालिकेने अल्पावधीतच प्रेक्षकांची मनं जिंकली. या मालिकेतून स्वप्नील जोशी व शिल्पा तुळसकर यांनी बऱ्याच काळानंतर मालिकाविश्वात पदार्पण केलं होतं. झी वाहिनीवरील या मालिकेत स्वप्नील व शिल्पा मुख्य भूमिकेत आहेत. ‘तू तेव्हा तशी’मधील अनामिका व सौरभ ही जोडी प्रेक्षकांच्या पसंतीस उतरली. परंतु, लवकरच ही मालिका प्रेक्षकांचा निरोप घेणार आहे.
‘तू तेव्हा तशी’ मालिकेने नुकतेच ३०० भाग पूर्ण केले आहेत. अनेक कठीण परिस्थितीतून गेलेल्या अनामिका व सौरभ या कपलची लव्ह स्टोरी या मालिकेतून पडद्यावर दाखवण्यात आली होती. वयाच्या चाळीशीत पुन्हा प्रेमात पडलेल्या स्वप्नील जोशी व शिल्पा तुळसकरची ऑन स्क्रीन जोडी प्रेक्षकांनाही भावली. झी वाहिनीवरील इतर मालिकांप्रमाणे या ‘तू तेव्हा तशी’लाही प्रेक्षकांचे भरपूर प्रेम मिळालं.
हेही वाचा>> इरफान खानच्या गर्लफ्रेंडला डेट करत होता नवाजुद्दीन सिद्दीकी, अभिनेत्याला समजलं अन्…
सध्या ‘तू तेव्हा तशी’ मालिका रंजक वळणावर आहे. या मालिकेतील वल्ली हे पात्र अनामिका व सौरभला वेगळं करण्यासाठी कट कारस्थान करत आहे. त्यामुळे अनामिका व सौरभच्या नात्यात पुन्हा वादळ आलं आहे. एकमेकांपासून दूर राहण्याचा निर्णय त्यांनी घेतला आहे. त्यामुळे आता मालिकेत पुढे काय घडणार? याची प्रेक्षकांना उत्सुकता आहे. तू तेव्हा तशी मालिकेत स्वप्नील जोशी व शिल्पा तुळसकरचा ऑन स्क्रीन रोमान्सही प्रेक्षकांना पाहायला मिळाला होता.
स्वप्नील जोशी व शिल्पा तुळसकरसह या मालिकेत अभिज्ञा भावे, सुहास जोशी, रुमाणी खरे या कलाकारांनी महत्त्वाच्या भूमिका साकारल्या आहेत. ‘तू तेव्हा तशी’ ही मालिका रात्री ८ वाजता प्रसारित व्हायची. आता या मालिकेच्या जागी ‘तुला शिकवीन चांगलाच धडा’ ही नवी मालिका सुरू होणार आहे. या मालिकेत शिवानी रांगोळे व हृषिकेश शेलार हे कलाकार मुख्य भूमिकेत आहेत.
