‘ठरलं तर मग’ मालिकेत लवकरच अर्जुन-सायलीच्या हनिमूनचा सीक्वेन्स सुरू होणार आहे. कॉन्ट्रॅक्ट मॅरेज असूनही फक्त कल्पनाची इच्छा असल्याने दोघेही हनिमूनला जाणार आहेत. या विशेष भागाचं चित्रीकरण करण्यासाठी ‘ठरलं तर मग’ मालिकेची संपूर्ण टीम एका दिवसासाठी माथेरानला रवाना झाली होती. याचे बरेच फोटो व व्हिडीओ सध्या सोशल मीडियावर व्हायरल झाले आहेत. अशातच मालिकेची खलनायिका प्रियाचे फोटो देखील इन्स्टाग्रामवर चर्चेत आले आहेत.
अर्जुनची बहीण अस्मिता ही सुभेदारांच्या घरातील सगळ्या अपडेट्स प्रियाला देत असते. सायली-अर्जुनचं लग्न खोटं असून, दोघांनीही फक्त मधुभाऊंच्या केससाठी कॉन्ट्रॅक्ट मॅरेज केल्याचा संशय आधीपासूनच प्रियाला असतो. त्यामुळे अस्मिताने हनिमूनबद्दल माहिती दिल्यावर प्रिया सायली-अर्जुनच्या मागोमाग माथेरानला जायचं ठरवते.
अर्जुन-सायलीने आपल्याला ओळखू नये म्हणून संपूर्ण वेशांतर करून प्रिया माथेरानमध्ये जाणार आहे. सध्या या शूटिंगदरम्यानचे अनेक फोटो व व्हिडीओ सोशल मीडियावर व्हायरल होत आहेत. यामध्ये प्रेक्षकांना प्रियाचे छोटे केस, डोळ्यावर कॉल असा हटके लूक पाहायला मिळत आहे. आता या दोघांच्या मागोमाग प्रिया माथेरानला गेल्याने मालिकेत नवीन काय ट्विस्ट येणार? हे पाहणं उत्सुकतेचं ठरणार आहे.
दरम्यान, हनिमून विशेष भागांत सायली-अर्जुनमधील नातं कसं बहरणार? दोघांच्या मैत्रीचं रुपांतर प्रेमात होईल का? आणि सगळ्यात महत्त्वाचं म्हणजे दोघांचा पाठलाग करत माथेरानला पोहोचलेल्या प्रियाच्या हाती नेमका कोणता पुरावा लागणार, सायली-अर्जुनचा खरा प्लॅन तिला कळेल का? असे असंख्य प्रश्न सध्या चाहत्यांच्या मनात निर्माण झाले आहेत. याशिवाय काही नेटकऱ्यांनी या व्हिडीओच्या कमेंट सेक्शनमध्ये मालिकेचं आणि प्रियाच्या या नव्या लूकचं भरभरून कौतुक केलं आहे.
