अभिनेत्री जुई गडकरी सध्या तिच्या ‘ठरलं तर मग’ या मालिकेमुळे प्रचंड चर्चेत आहे. गेल्या अनेक महिन्यांपासून अभिनेत्रीची ही मालिका छोट्या पडद्यावर अधिराज्य गाजवत आहे. यापूर्वी जुईच्या ‘पुढचं पाऊल’ या मालिकेला देखील प्रेक्षकांचा असाच प्रतिसाद मिळाला होता. ‘ठरलं तर मग’मुळे आज जुईला घराघरांत सायली अशी नवीन ओळख मिळाली आहे. मालिकेला मिळालेल्या भरघोस यशामुळे अभिनेत्रीने नुकतीच एका मुलाखतीला हजेरी लावली होती. यावेळी जुईने वैयक्तिक आयुष्याबद्दल अनेक खुलासे केले.
वैयक्तिक आयुष्यात जुईने मांसाहार खाणं बंद केलं आहे राजश्री मराठीच्या मुलाखतीत यामागील कारण सांगत अभिनेत्री म्हणाली, “यामागे अनेक अध्यात्मिक कारणं आहे. आपण देवाचं काहीतरी करत असतो आणि त्याचबरोबर मांसाहारी पदार्थ (नॉन व्हेज) खातो मला ही गोष्ट पटत नाही. त्यात मी भयंकर प्राणीप्रेमी आहे. माझ्या घरात खूप प्राणी आहेत त्यामुळे मांसाहारी पदार्थ खाताना मला त्रास व्हायचा.”
हेही वाचा : ‘ठरलं तर मग’ : “मिसेस सायली माफ करा”, बायकोची समजूत काढण्यासाठी अर्जुनने बनवला खास प्लॅन, पाहा प्रोमो
जुई गडकरी पुढे म्हणाली, “एके दिवशी असंच मी ठरवून टाकलं…आपल्याला ज्या वयात कळत नव्हतं तेव्हा आपण खाल्लं ठिके…पण, आता कळू लागलंय आता नको. त्या दिवसापासून मी मांसाहारी पदार्थ खाणं सोडून दिलं. आता मी आयुष्यात परत मांसाहार करणार नाही. माझ्या आई-बाबांच्या घरी सगळे खातात. पण, जिथे मी आता राहते त्या घरात मांसाहारी पदार्थ आणायला माझी परवानगी नाही. आता आयुष्यभरासाठी नॉन व्हेज सोडलंय.”
“मध्यंतरी मी सोळा सोमवार केले होते. ते सोमवार करताना साधारण साडे पाच महिन्यांचा कालावधी गेला. त्यामुळे नॉन व्हेजपासून दूर राहणं मला फार अवघड गेलं नाही. मला देवाने खूप काही दिलंय. त्या तुलनेत मांसाहार सोडणं काहीच नाहीये.” असं जुई गडकरीने सांगितलं.
