स्टार प्रवाहवरील ‘ठरलं तर मग’ मालिका गेल्या वर्षभरापासून टीआरपीच्या शर्यतीत अव्वलस्थानी आहे. सायली, अर्जुन, प्रिया, कल्पना, साक्षी, पूर्णा आजी या मालिकेतील प्रत्येक पात्राने प्रेक्षकांच्या मनात एक वेगळं स्थान निर्माण केलं आहे. यामध्ये सायलीची प्रमुख भूमिका साकारणारी अभिनेत्री जुई गडकरी घराघरांत लोकप्रिय आहे. नुकतंच तिने इन्स्टाग्रामवर ‘आस्क मी सेशन’ घेतलं. यावेळी अभिनेत्रीला मालिकेसंदर्भातील अनेक प्रश्न विचारण्यात आले. या सगळ्या प्रश्नांची उत्तरं देत जुईने मालिकेच्या आगामी ट्रॅकविषयी प्रेक्षकांना थोडीफार हिंट दिली आहे.
‘ठरलं तर मग’ मालिकेत सध्या एकीकडे अर्जुनचे वडील प्रताप सुभेदार यांना अटक झाल्याचा सीक्वेन्स सुरू आहे. तर, दुसरीकडे अर्जुन आणि चैतन्यच्या अनेक वर्षांच्या मैत्रीत साक्षीमुळे दुरावा आल्याचं पाहायला मिळत आहे. यासंदर्भात जुईला “चैतन्यला त्याची चूक केव्हा समजणार?” “महिमत आणि साक्षीला अटक केव्हा होणार?” आणि “सायली-अर्जुनचं कॉन्ट्रॅक्ट मॅरेज सुभेदार मान्य करतील का?” असे अनेक प्रश्न विचारण्यात आले. या सगळ्या प्रश्नांची अभिनेत्रीने उत्तरं दिली आहेत.
जुई गडकरी या सगळ्या प्रश्नांना उत्तरं देत लिहिते, “मालिकेत लवकरच तुम्हाला अशाप्रकारचा ट्रॅक पाहायला मिळेल. त्यासाठी तुम्ही आगामी एपिसोड नक्की एपिसोड बघा. खूप गोष्टींवर सध्या काम सुरू आहे. यापेक्षा जास्तीचं मी काहीही सांगू शकत नाही.”
‘ठरलं तर मग’ या मालिकेची संपूर्ण कथा सायली-अर्जुनच्या कॉन्ट्रॅक्ट मॅरेजवर आधारलेली आहे. नायिका मधुभाऊंना सोडवण्यासाठी अर्जुनशी कॉन्ट्रॅक्ट मॅरेज करण्याचा निर्णय घेते. परंतु, सुभेदारांच्या घरी याबद्दल कोणाला काहीच माहीत नाहीये. दोघांच्या कॉन्ट्रॅक्ट मॅरेजबद्दल केवळ चैतन्य आणि कुसूम या दोघांनाच कल्पना असते.
दरम्यान, मालिकेबद्दल सांगायचं झालं, तर अर्जुनचे वडील प्रताप सुभेदारांना तुरुंगातून सोडवण्यासाठी रविराज किल्लेदार पुढाकार घेत असल्याचं सध्या मालिकेत पाहायला मिळत आहे.
