‘झी मराठी’वरील ‘तुला शिकवीन चांगलाच धडा’ या मालिकेला अल्पावधीतच प्रेक्षकांकडून चांगली पसंती मिळत आहे. यामध्ये शिवानी रांगोळेने ‘अक्षरा’, कविता मेढेकरांनी ‘भुवनेश्वरी’, तर ऋषिकेश शेलारने ‘अधिपती’ची भूमिका साकारली आहे. काही महिन्यांपूर्वी मालिकेत अक्षरा-अधिपतीचा विवाहसोहळा थाटामाटात पार पडला होता. अक्षरा ही शाळेत शिक्षिका असते, तर अधिपती हा गर्भश्रीमंतीत वाढलेला मुलगा या मास्तरीणबाईंच्या प्रेमात पडतो. या दोघांच्या अनोख्या प्रेमकहाणीवर या मालिकेचं कथानक आधारलेलं आहे.
‘तुला शिकवीन चांगलाच धडा’ या मालिकेची निर्मिती अभिनेत्री शर्मिष्ठा राऊतकडून करण्यात आली आहे. ख्रिसमस सेलिब्रेशनच्या निमित्ताने शर्मिष्ठाने नुकतीच मालिकेच्या सेटला भेट दिली होती. याचा खास फोटो शिवानी रांगोळने तिच्या सोशल मीडियावर शेअर केला आहे.
शर्मिष्ठा राऊतने या फोटोमध्ये शिवानी रांगोळेला उचलून घेतल्याचं पाहायला मिळत आहे. या फोटोच्या कॅप्शनमध्ये शिवानी लिहिते, “जेव्हा निर्माती अभिनेत्रीला डोक्यावर बसवते. आमच्या सेटवरच्या ख्रिसमस सेलिब्रेशनचे खास क्षण…शर्मिष्ठा राऊत आम्हा सर्वांना नेहमीच पाठिंबा देते. सेटवर कायम असंच सकारात्मक वातावरण ठेवण्यासाठी तिला आणि तिच्या संपूर्ण टीमला शुभेच्छा!”
दरम्यान, ‘तुला शिकवीन चांगलाच धडा’ या मालिकेला प्रेक्षकांचा सुद्धा चांगला प्रतिसाद मिळत आहे. यंदाच्या ‘झी मराठी’ पुरस्कार सोहळ्यात या मालिकेचा वाहिनीवरील सर्वोत्कृष्ट मालिका म्हणून गौरव करण्यात आला. याशिवाय अभिनेत्री शिवानी रांगोळेला सर्वोत्कृष्ट जोडी, नायिका, लक्षवेधी चेहरा असे तीन पुरस्कार मिळाले आहेत.
