टीव्ही अभिनेत्री तुनिषा शर्माच्या आत्महत्या प्रकरणात रोज नवे खुलासे होत आहेत. आत्महत्येला प्रवृत्त केल्याप्रकरणी तुनिषाचा बॉयफ्रेंड व सहकलाकार शीझान खान चार दिवसीय पोलीस कोठडीत आहे. शीझानची पोलीस कसून चौकशी करत आहेत. दरम्यान, शीझानने तुनिषा संदर्भात अनेक खुलासे पोलीस चौकशीत केले आहेत.
शीझान खानने ब्रेकअप केल्यामुळे तुनिषा शर्माने आत्महत्या केल्याचा आरोप त्याच्यावर आहे. यापूर्वीही तुनिषाने आत्महत्या करण्याचा प्रयत्न केला असल्याचा धक्कादायक खुलासा शीझानने पोलीस चौकशीत केला आहे. “मृत्यूच्या काही दिवसांपूर्वीही तुनिषाने आत्महत्या करण्याचा प्रयत्न केला होता. तेव्हा मीच तिला या संकटातून वाचवलं होतं”, असं शीझानने सांगितलं आहे.
हेही वाचा>> “तिच्यामुळे शीझान खानचं करिअरही…”, तुनिषा शर्मा आत्महत्या प्रकरणावर प्रसिद्ध अभिनेत्याचं ट्वीट
हेही वाचा>> लग्नानंतर कुंकू न लावल्यामुळे देवोलिना भट्टाचार्जी पुन्हा ट्रोल; नेटकरी म्हणतात “तू पुढची तुनिषा शर्मा…”
तुनिषाच्या आईलाही तिच्या आत्महत्येबाबत कल्पना होती, असंही त्याने पोलीस चौकशीत उघड केलं आहे. “तुनिषाने आत्महत्या करण्याचा प्रयत्न केल्यानंतर तिच्या आईला मी फोन करुन घडलेल्या प्रकाराची माहिती दिली होती. तुनिषाशी बोलून तिची काळजी घेण्यास सांगण्याचेही तिच्या आईला मी सांगितले होते”, असं तो म्हणाला. तुनिषाशी प्रेमसंबंध असल्याचंही शीझानने पोलीस चौकशीत मान्य केले आहे. याबाबत पोलीस अधिक तपास करत आहेत.
तुनिषाने २४ डिसेंबरला अलिबाबा: दास्तान ए कबूल मालिकेच्या सेटवर शूटिंगदरम्यानच गळफास घेत आत्महत्या केली होती. या मालिकेत ती मुख्य नायिकेची भूमिका साकारत होती. तुनिषाने अनेक मालिकांसह चित्रपटांतही काम केलं आहे. तिच्यावर २७ डिसेंबरला अंत्यसंस्कार होणार आहेत.
