टीव्ही अभिनेत्री तुनिषा शर्माने २४ डिसेंबरला आत्महत्या करत जीवन संपवलं. ‘अलिबाबा: दास्तान ए कबूल’ मालिकेच्या सेटवर तिने मेकअपरुममध्येच गळफास घेतला. दरम्यान तुनिषाचा बॉयफ्रेंड व या मालिकेमधील तिचा सहकलाकार शीझान खानवर अनेक आरोप करण्यात येत आहेत. तुनिषा व शीझान या मालिकेमध्ये मुख्य भूमिकेत होते. आता या मालिकेबाबतच एक नवी माहिती समोर आली आहे.
‘अलिबाबा: दास्तान ए कबूल’मध्ये यापुढे तुनिषाची भूमिका कोण साकारणार? हा प्रश्न होता. शिवाय घडलेल्या प्रकारानंतर शीझान मालिकेमध्ये काम करताना दिसणार का? अशीही चर्चा सुरू होती. पण मालिकेच्या निर्मात्यांनी एक महत्त्वपूर्ण निर्णय घेतला आहे. ‘अलिबाबा: दास्तान ए कबूल’ भाग एक लवकरच बंद होणार आहे.
‘आजतक’च्या वृत्तानुसार, निर्मात्यांनी ‘अलिबाबा: दास्तान ए कबूल’च्या पहिल्या भागाचे काही एपिसोड आधीच चित्रीत करून ठेवले होते. सध्या हेच भाग प्रदर्शित केले जातील. त्यानंतर ही मालिका बंद करण्यात येईल. काही दिवसांच्या ब्रेकनंतर ‘अलिबाबा: दास्तान ए कबूल’चा दुसरा भाग सुरू करण्यात आली.
मालिकेच्या दुसऱ्या भागामध्ये मात्र शीझान खान नसणार हेही स्पष्ट झालं आहे. निर्मात्यांच्या म्हणण्यानुसार दुसऱ्या भागामध्ये नवे कलाकार मुख्य भूमिकेमध्ये असणार आहेत. नव्या मुख्य कलाकारांना या मालिकेच्या दुसऱ्या भागामधून पुन्हा लाँच करण्यात येणार आहे. म्हणजेच शीझानचा मालिकेमधून पत्ता कट झाला आहे.
