अभिनेत्री तुनिषा शर्माच्या आत्महत्यामुळे सिनेसृष्टीला पुन्हा एकदा मोठा धक्का बसला आहे.सोनी सब टीव्हीवरील ‘अलिबाबा: दास्तान ए काबुल’ या मालिकेत तुनिषा ही मुख्य भूमिका साकारत होती. तुनिषाने मालिकेच्या सेटवरच गळफास घेऊन जीवन संपवल्याने सर्वांनाचा धक्का बसला आहे. तुनिषाच्या आत्महत्येनंतर तिचा ‘अलिबाबा: दास्तान ए काबुल’ या मालिकेतील सह-कलाकार आणि कथित बॉयफ्रेंड शिझान खान याला अटक करण्यात आली होती. यानंतर त्याला चार दिवसांची पोलीस कोठडी सुनवण्यात आली आहे. आता या प्रकरणी शिझान खानच्या कुटुंबियांनी पहिली प्रतिक्रिया दिली आहे.
तुनिषा शर्माच्या मृत्यूनंतर अनेक खुलासे होताना दिसत आहे. तिच्या मृत्यूनतंर अभिनेत्रीच्या आईने ‘अलिबाबा: दास्तान ए काबुल’ या मालिकेतील सह-कलाकार आणि कथित बॉयफ्रेंड शिझान खानवर गंभीर आरोप केले आहेत. तिच्या आईने दिलेल्या तक्रारीवरुन याप्रकरणी गुन्हा दाखल करण्यात आला होता. आत्महत्येसाठी प्रवृत्त केल्याप्रकरणी तिचा सहकलाकार शिझान खानला अटक करण्यात आली होती. शिझान खानचे तुनिषाबरोबर प्रेमसंबंध होते. या प्रेमाच्या नैराश्येतूनच तुनिषाने ही आत्महत्या केली असं तिच्या आईचं म्हणणं आहे.”
आणखी वाचा : तुनिषा शर्मा आत्महत्येप्रकरणी शिझान खानला कोठडी, श्वास गुदमरल्यामुळे मृत्यू अन्…; गेल्या २४ तासात नेमकं काय घडलं?
यानंतर पोलिसांनी शिझानच्या विरोधात आत्महत्येस प्रवृत्त केल्याप्रकरणी गुन्हा दाखल केला. त्यानंतर रात्री उशिरा त्याला अटक करण्यात आली. या प्रकरणानंतर रविवारी दुपारी त्याला वसई न्यायालयात हजर करण्यात आले. यावेळी न्यायालयाने शिझानला ४ दिवसांची पोलीस कोठडी सुनावली आहे. यावेळी पोलिसांकडून त्याची कसून चौकशी करणार आहेत.
या प्रकरणानंतर आता शिझान खानची बहीण पलक खान हिने प्रतिक्रिया दिली आहे. मी माझ्या भावाच्या सुटकेसाठी सातत्याने प्रयत्न करत आहे. तो निर्दोष आहे. याप्रकरणाचे सत्य लवकरच समोर येईल, असे तिने ‘आज तक’शी बोलताना सांगितले. सध्या आमच्या संपूर्ण कुटुंबाची परिस्थिती अत्यंत बिकट आहे, असेही ती म्हणाली.
आणखी वाचा : तुनिषा शर्माच्या मृत्यू नेमका कशामुळे झाला? कारण आले समोर
दरम्यान तुनिषा शर्माच्या आत्महत्येनंतर अनेक प्रश्न उपस्थित होत आहेत. वयाच्या २० व्या वर्षी स्व:बळावर टेलिव्हिजन इंडस्ट्रीत इतकं मोठं स्थान मिळवलेल्या या अभिनेत्रीने अचानक आत्महत्येचा पर्याय का निवडला? तिने आत्महत्येसाठी तिचा सहकलाकार आणि बॉयफ्रेंड मोहम्मद शिझानची मेकअप रूम का निवडली? असे अनेक प्रश्न उपस्थित होत आहेत. या प्रश्नांची उत्तरे पोलिसांच्या तपासानंतरच समोर येणार आहेत.
