बिग बॉसच्या घरात झालेली मैत्री खऱ्या आयुष्यातदेखील टिकणार का, असा प्रश्न प्रेक्षकांना पडलेला असतो. अनेक स्पर्धक फक्त शोसाठी मैत्री करताना दिसतात; मात्र शोबाहेर त्यांच्यात सख्य दिसत नाही. परंतु, काहीजण शोबाहेरही आपली मैत्री जपताना दिसतात. आता बिग बॉस मराठी ५ मधील काही सदस्य पुन्हा एकदा एकत्र दिसले आहेत. सोशल मीडियावर शेअर करण्यात आलेल्या एका व्हिडीओमध्ये इरिना रुडाकोवा आणि वैभव चव्हाण यांनी कोल्हापूरमध्ये धनंजय पोवारची भेट घेतल्याचे पाहायला मिळत आहे.
अरविंद दिवासे या सोशल मीडिया वापरकर्त्याने इन्स्टाग्रामवर एक व्हिडीओ शेअर केला आहे. हा व्हिडीओ वैभव चव्हाणनेदेखील इन्स्टाग्रामवर स्टोरीला शेअर केला आहे.
या व्हिडीओमध्ये वैभव चव्हाण कोल्हापूरला गेल्याचे पाहायला मिळत आहे. त्याच्याबरोबर इरिना रुडाकोवादेखील आहे. व्हिडीओमध्ये धनंजय पोवार, इरिना व वैभव हे मंदिरात आले असून, ते अंबाबाईचे दर्शन घेत असल्याचे पाहायला मिळत आहे. त्यानंतर इरिना मंदिर परिसरातील एका झाडाखाली बसल्याचे दिसत आहे.
जेव्हा सूरज चव्हाण ट्रॉफी जिंकून घरी परतला होता. त्यावेळी वैभव चव्हाण आणि इरिना यांनी त्याच्या घरी भेट दिली होती. त्याबरोबरच सूरजचे कौतुक करीत त्याचा प्रसिद्ध झापुक झुपूक हा डायलॉग म्हटल्याचे इरिनाने शेअर केलेल्या व्हिडीओमध्ये पाहायला मिळाले होते.
आता वैभव आणि इरिनाने कोल्हापूरला जात अंबाबाईचे दर्शन घेतले आहे. त्यांच्याबरोबर धनंजय पोवारदेखील दिसत आहे. धनंजय पोवारने बिग बॉसच्या घराबाहेर पडल्यानंतर एका मुलाखतीत वैभव चव्हाण मित्र म्हणून माझ्यापासून दूर गेलेला मला आवडणार नाही, असे म्हटले होते. तर, वैभवनेदेखील अनेकदा धनंजय पोवार चांगला मित्र असल्याचे म्हटले आहे.
दरम्यान, बिग बॉस मराठीमध्ये इरिना आणि वैभव यांच्यातील मैत्री प्रेक्षकांना आवडत होती. मात्र, धनंजय पोवार आणि वैभव चव्हाण यांच्यातील मैत्री शोनंतरही दिसत आहे. कारण- बिग बॉसच्या घरात दोघेही वेगवेगळ्या गटांतून खेळत असल्याचे पाहायला मिळत होते.
धनंजय पोवारनेदेखील एक व्हिडीओ सोशल मीडियावर शेअर केला असून त्यामध्ये शाळेतील मुलांनी त्याच्यासहित वैभव आणि इरिनाभोवती गर्दी केल्याचे पाहायला मिळत आहे. या व्हिडीओला त्याने ‘कमाई…’, अशी कॅप्शन दिली आहे.
आता बिग बॉसनंतर या सगळ्या स्पर्धकांमध्ये कसे नाते असणार आणि त्यांच्या करिअरची वाटचाल पुढे कशी असणार हे पाहणे महत्त्वाचे ठरणार आहे.
